Moeletsi oa Basotho Sehopotso sa Martin oa Tours ea Halalelang, Mobishopo.
Beke ea 32 har’a selemo
Labobeli
Ho baloa Bukeng ea Pele ea Likhosi, (19:16.19-21)
“Elisha a tloha, a sala Elia morao.”
Matsatsing ao, Morena a re ho Elia: U tlotse Elisha, mor’a Shafathe, oa Abele-Mehola, ho ba moprofeta ea tla u hlahlama.
Eaba Elia o tloha moo, a fumana Elisha, mor’a Shafathe, a lema liakere tse leshome le metso e ‘meli; nakong ena o n’a le akereng ea qetello. Elia a feta haufi le eena, ‘me a akhela seaparo sa hae mahetleng a hae.
Ke ha Elisha a sia lipholo, a matha kamor’a Elia, a re: A nke ke e’o aka ntate le ‘me ho ba lumelisa, ke nt’o u sala morao. Elia a mo araba, a re: Khutla! U hanetsoe ke mang?
Elisha a khaohana le eena, a nka lipholo tse peli tsa sepane, a etsa sehlabelo ka tsona. A besa joko ea lipholo ho pheha nama ka eona, a fepa batho ba hae nama eo. A nt’o tloha, a sala Elia morao, ‘me a mo sebeletsa.
PESALEMA 15
KE UENA, MORENA, EA MPOLOKELANG KABELO EA KA.
Ak’u mpaballe, oho Molimo,
hobane ke tšabela ho uena.
Ke itse ho Morena: Ke uena Moren’a ka.
Morena, ke uena lefa la ka le mohope oa ka,
ke uena ka sebele ea mopolokelang kabelo ea ka.
KE UENA, MORENA, EA MPOLOKELANG KABELO EA KA.
Ke tla boka Morena, moeletsi oa ka;
le bosiu pelo ea ka e ntse e ntaea.
Ke ikemiselitse hore e be sa le
ke hopotse Morena kamehla;
ha Morena a le pel’a ka, nke ke ka oa.
KE UENA, MORENA, EA MPOLOKELANG KABELO EA KA.
U tla mpontša tsela ea bophelo,
thabo e khaphatsehang e fumanoang ho eena,
le nyakallo e sa feleng,
e fuoang ba lulang pel’a hau.
KE UENA, MORENA, EA MPOLOKELANG KABELO EA KA.
Ho baloa Evangeling e halalelang e ngotsoeng ke Mareka. (10:17-30)
“U e’o rekisa tsohle, u ntan’o tla, u ntatele.”
Ka nako eo, ha Jesu a kena tseleng, motho e mong a tla a matha, a otla ka lengole ka pele ho eena, a ‘motsa, a re: Moruti ea molemo, ke tla etsa joang hore ke tle ke rue bophelo bo sa feleng na?
Jesu a re ho eena: U mpitsa ea molemo ka baka la’ng? Ha ho ea molemo, ha e se Molimo a inotši. U tseba melao: U se ke ua bolaea, u se ke ua feba, u se ke ua utsoa, u se ke ua fana ka bopaki ba bohata, u se ke ua senyetsa ba bang, hlonepha ntat’ao le ‘m’ao.
Eo a mo araba, a re: Moruti, tsena tsohle ke li bolokile ho tloha bocheng ba ka. Jesu a mo talima, a mo rata ‘me a re ho eena: U sa haelloa ke ntho e le ‘ngoe feela: tsamaea, u e’o rekisa tsohle tseo u nang le tsona, u fane ho mafutsana, ‘me u tla ba le leruo leholimong; u ntan’o tla, u ntatele.
Empa eo a khathala matla ke polelo eo, a ba a tsamaea a soabile, hobane o n’a e-na le maruo a mangata. Jesu a ea bohle ka mahlo, eaba o re ho barutuoa ba hae: Barui ba tla kena ‘musong oa Molimo ka thata hakakang! Barutuoa ba ne ba hloletsoe ke lipolelo tsena.
Empa Jesu a boela a ba bolella, a re: Bana ba ka, ho thata hakakang ho kena ‘musong oa Molimo! Ho bile ho bonolo ho kamele ho feta ka lesoba la nale, ho e-na le hore morui a kene ‘musong oa Molimo.
Bona ba makala le ho feta, ba bolellana ba re: Joale ke mang ea ka pholohang? Eaba Jesu oa ba sheba, o re: Ena ke taba e sitang batho, empa e seng Molimo, hobane ha ho letho le sitang Molimo.
[Ke moo Peterosi a ileng a qala ho bua le eena, a re: Bona, rona re tlohetse tsohle, ‘me re u latetse. ‘Me Jesu a araba, a re: Kanete, ke re ho lona, ha ho motho ea tla siea ntlo ea hae, kapa bana babo kapa likhaitseli, kapa ‘m’ae kapa ntat’ae, kapa bana kapa masimo, ka baka la ka le ka baka la Evangeli, a sa tl’o abeloa halekholo nakong ea joale, matlo, le bana babo, le likhaitseli, le bo-‘m’ae, le bana, le masimo hammoho le litlhoriso, ‘me nakong e tlang a fuoe bophelo bo sa feleng.]
