La 5 Phupu 2025

Labotšelela

Beke ea 14 har’a selemo

Ho baloa Bukeng ea Genese. (27:1-5.15-29)

“Jakobo a amoha ngoan’abo boholoane ba hae, a mo amoha le tlhohonolofatso ea hae.”

Eare ha Isaaka a s’a tsofetse, mahlo a hae a ile a foufala hoo a neng a se a sa bone letho. A bitsa mor’a hae e moholo Esau, a re ho eena: Mor’a ka! Eena a re: Ke ‘na enoa. Isaaka a re: Bona, ke tsofetse; le letsatsi la lefu la ka ha ke le tsebe. Joale, ak’u nke libetsa tsa hau, khohlopo le seqhą, u e’o ntsomela phoofolo naheng. U mphehele tse hlabosehang, kamoo ke li ratang kateng, u b’u ntlisetse tsona, ke je, ke tle ke u hlohonolofatse pele ke e-shoa.

Athe Rebeka o n’a nts’a mametse ha Isaaka a bua le Mor’a hae Esau. Eaba Esau o ea naheng ho ea tsoma phoofolo eo a tla e tlisetsa ntat’ae. Rebeka a nka liaparo tse ntlehali tsa mor’a hae e moholo Esau, tseo a neng a li bolokile ka tlung, ‘me a li apesa mor’a hae e monyenyane Jakobo. A mo thata matsohong le molaleng o lehoete ka matlalo a lipotsanyane. A beha liatleng tsa mor’a hae Jakobo masutsa le bohobe, tseo a li phehileng.

 Joale Jakobo a ea ho ntat’ae, a re: Ntate! Eena a re: Ke ‘na enoa. U mang, ngoan’a ka? Jakobo a re ho ntat’ae: Ke ‘na Esau, letsibolo la hau, ke entse kamoo u ntaetseng kateng. Tsoha he, u lule, u je seo ke se tsomileng, u be u ntlhohonolofatse. Isaaka a re ho mor’a hae: U fumane tsohle kapele hakakang, mor’a ka! A re: Ke Morena, Molimo ua hau ea entseng hore ke fumane kapele.

Isaaka a re ho Jakobo; Atamela pel’a ka, ke u phopholetse, mor’a ka, e le hore ke ikholise hore na u hlile u eena mor’a ka Esau kapa che. Jakobo a atamela pel’a Isaaka, ntat’ae ‘me eena hoba a mo phopholetse, a re: Ha e le lentsoe lona ke la Jakobo, empa matsoho ke a Esau.

Ha a ka mo tseba, hobane matsoho a hae a n’a le mohoete joaloka matsoho a Esau moholoane oa hae; a ba a mo hlohonolofatsa. A nt’o re: Na u hlile u eena mor’a ka Esau? A re: E, ke eena. Eaba o re: Mor’a ka a mphe lijo tseo a tsoa li tsoma, ke tsoe ke mo hlohonolofatsa.

Hoba a mo tlisetse, a ja; a mo fa le veine, a noa. Eaba Isaaka ntat’ae o re ho eena: Atamela pel’a ka, mor’a ka, u nkake. A atamela, a aka ntat’ae ea ileng o utloa monko o monate oa liaparo tsa hae ‘me a mo hlohonolofatsa, a re:

Utloang! Monko oa mora oa ka o joaloka monko oa tšimo e hlohonolofalitsoeng ke Morena! Molimo a ke a u fe phoka ea leholimo le manoni a lefatše, chai ea koro le veine!

Lichaba li ke li u sebeletse, merabe e iname pel’a hau! U be morena oa bana beno, bana ba ‘m’ao ba iname pel’a hau! Ho rohakoe ea u rohakang, ho hlohonolofatsoe ea u hlohonolofatsang!

PESALEMA 134

RORISANG MORENA, HOBANE O MOLEMO.

Rorisang Morena, rorisang lebitso la Morena,

mo roriseng, lona bahlanka ba Morena,

lona ba emeng Tlung ea Morena,

mabaleng a Ntlo ea Molimo oa rona.

RORISANG MORENA, HOBANE O MOLEMO.

Rorisang Morena, hobane o molemo,

rokang lebitso la hae ka lifela hobane le monate,

hobane Morena o ikhethetse Jakobo,

Israele ho ba leruo la hae.

RORISANG MORENA, HOBANE O MOLEMO.

Kea tseba hore Morena o moholo,

le hore Moren’a rona o moholo ho feta melimo eohle.

Tsohle tseo a li ratang Morena oa li etsa,

leholimong le lefatšeng,

maoatleng le bolibeng ba ‘ona.

RORISANG MORENA, HOBANE O MOLEMO.

Ho baloa Evangeling e halalelang e ngotsoeng ke Matheus. (9:14-17)

“Na ba ka hlomoha nakong eo monyali a ntseng a e-na le bona?”

Ka nako eo, barutuoa ba Joannes ba tla ho Jesu, ba re: Ke ka baka la’ng ha rona le Bafarisi re itima lijo hangata, empa barutuoa ba hau bona ba sa itime? Jesu a ba araba a re: Ana baetsana ba ka hlomoha nakong eo monyali a ntseng a e-na le bona na? Ho tla tla matsatsi ao ka ‘ona monyali a tla tlosoa ho bona, e be hona ba ka itimang.

Joale motho h’a ke a rokelle setsiba sa lesela le lecha seaparong sa khale, hobane setsiba se ka hlephola seaparo, ‘me sa eketsa ho taboha. Le teng motho ha a ke a tšela veine e ncha makukeng a khale, esere mohlomong makuka a phatloha, veine ea tšoloha, le ‘ona makuka a senyeha; motho o ee a mpe a tšele veine e ncha makukeng a macha, ‘me li bolokeha bobeli ba tsona.