Moeletsi oa Basotho 2 Mphalane 2026
Labohlano
Ho baloa Bukeng ea Exoda. (23:20-23)
“Lengeloi la ka le tla u etella pele.”
Ke sena seo Morena a se bolelang: Ke tla romela lengeloi la ka le tle le u etelle pele, le u etelle pele, le u lebele tseleng ea hao ‘me le u fihlise sebakeng seo ke u lokiselitseng sona. U le hlomphe ‘me u mamele lentsoe la lona. U se ke ua le tella, hobane le ke ke la u leballa phoso e joalo, ka ha le eme Lebitsong la ka.
Empa ha eba u ka mamela lentsoe la lona ka hloko ‘me ua etsa tsohle tseo ke li bolelang, ke tla ba sera sa lira tsa hao, ke tla loantša ba u loantšang. Lengeloi la ka le tla u etella pele, ‘me le u ise naheng ea ba-Amore, ea ba-Hethe, ea bo-Ferese, ea ba-Kanaana, ea ba-Heve le ea ba-Jebuse, bao ke tla ba felisa.
Pesalema 90
O LAETSE MANGELOI A HAE HO U LEBELA TSELENG TSOHLE TSA HAO.
Uena ea phelang tšireletsong ea Ea holimo-limo,
ea lulang moriting oa Ea matla-‘ohle,
e-re ho Morena: U setšabelo sa ka,
u qhobosheane ea ka,
u Molimo oa ka eo ke mo tšepileng.
O LAETSE MANGELOI A HAE HO U LEBELA TSELENG TSOHLE TSA HAO.
Hobane ke eena ea u tšoasollang
lerabeng la sechehi, le koluoeng e timetsang.
O tla u koahela ka masiba a hae,
‘me u tla tšabela tlas’a mapheo a hae:
ho tšepahala ha hae ke thebe le tšireletso ea hao.
O LAETSE MANGELOI A HAE HO U LEBELA TSELENG TSOHLE TSA HAO.
U ke ke ua tšaba liriti tsa bosiu,
kapa motsu oa seqha o bebang motšeare,
leha e le koluoa e khukhunang lefifing,
kapa lefu la seoa le tlokang har’a mp’a motšeare.
O LAETSE MANGELOI A HAE HO U LEBELA TSELENG TSOHLE TSA HAO.
Ha ho tlokotsi e ka u hlahelang,
ha ho kotlo e ka thetsang ntlo ea hao.
Hobane o laetse mangeloi a hae
ho u lebela tseleng tsohle tsa hao.
O LAETSE MANGELOI A HAE HO U LEBELA TSELENG TSOHLE TSA HAO.
Ho baloa Evangeling e halalelang e ngotsoeng ke Matheus. (18:1-5.10)
“Leholimong mangeloi a bona a bona ka mehla sefahleha sa Ntate ea maholimong.”
Ka nako eo, barutuoa ba tla ho Jesu, ba re: Ha u bona, e moholo ke mang ‘musong oa maholimno? Eaba Jesu o bitsa ngoana e monyenyane, o mo emisa ka hare ho bona, o re: Ka ‘nete kea le bolella, ha le sa sokolohe la ba joaloka bana ba banyenyane, le ke ke la kena ‘musong oa maholimo. Ea ikokobetsang a be joaloka ngoana enoa e monyenyane, ke eena ea leng moholo musong oa maholimo. Ea amohelang ngoana e monyenyane ea joaloka enoa, ka baka la lebitso la ka, o amohela ‘na.
Hlokomelang, le se ke la nyelisa le ea mong oa ba banyenyane bana, hobane, kea le bolella, mangeloi a bona leholimong a bona ka mehla sefahleho sa Ntate ea maholimong.
