Moeletsi oa Basotho Beke ea 16 har’a selemo
‘Mantaha
Ho baloa Bukeng ea Moprofeta Mikea. (6:1-4.6-8)
“Uena motho, Morena o u tsebisitse seo a se batlang ho uena.”
Mamelang he seo Morena a se bolelang: Ema, u hlahlele nyeoe mahlong a lithaba, le maralla a ke a utloe lentsoe la hao. Mamelang nyeoe ea Morena, o na le nyeoe le sechaba sa hae, o tseka le Israele, o re: Uena sechaba sa ka, ke u entse’ng? Ke u tenne ka’ng? Nkarabe hle. Ke u ntsitse naheng ea Egepeta, ka u lopolla bokhobeng, ka ba ka u romella Moshe, Aarone le Miriama, ho u etella pele.
Ke tla tla ke nkile’ng ha ke hlaha pel’a Morena, ha ke tlil’o inama ka pel’a Molimo ea holimo-limo? Ebe ke tla hlaha pel’a hae ka licheso, ka manamane a selemo se le seng? Na o tla khahloa ke likete tsa lipheleu, ke
mashome a likete a linoka tsa oli? Ebe ke tla fana ka mor’a ka oa matsibolo bakeng sa litlolo tsa ka, ngoana oa mala a ka bakeng sa sebe se entsoeng ke ‘na?
Uena motho, Morena o u tsebisitse se setle le seo a se batlang ho uena; ha a u batle ho etsa ho hong ha e se ho etsa se lokileng ho ba le botsepehi le ho tsamaea ka boikokobetso pel’a Molimo oa hao.
PESALEMA 49
EA TSAMAEANG TSELENG EA ‘NETE KE TLA ‘MONTŠA PHOLOHO EA MOLIMO.
Mphutheleng metsoalle ea ka,
e tiisitseng selekane le ‘na ka sehlabelo.
Maholimo a phatlalatsa toka ea hae,
hobane Molimo ke eena moahIoli.
EA TSAMAEANG TSELENG EA ‘NETE KE TLA ‘MONTŠA PHOLOHO EA MOLIMO.
Ha ke u nyatse ka baka la mahlabelo a hao,
etsoe u nketsetsa licheso ka mehla.
Ha ke hloke pohoana ea lesaka la hao,
leha e le phooko ea mohlape oa hao,
EA TSAMAEANG TSELENG EA ‘NETE KE TLA ‘MONTŠA PHOLOHO EA MOLIMO.
U na le tokelo efe ea ho bolela melao ea ka,
le ea ho bolelisa selekane sa ka ka molomo oa hao,
uena ea hloileng khalemo,
ea furallang lipolelo tsa ka?
EA TSAMAEANG TSELENG EA ‘NETE KE TLA ‘MONTŠA PHOLOHO EA MOLIMO.
U nts’u etsa tjee, ebe u re nka thola?
U hopola hore ke tšoana le uena?
Ea ‘nyehelang sehlabelo sa teboho oa ntlhompha,
ea tsamaeang tseleng ea ‘nete
ke tla ‘montša pholoho ea Molimo.
EA TSAMAEANG TSELENG EA ‘NETE KE TLA ‘MONTŠA PHOLOHO EA MOLIMO.
Ho baloa Evangeling e halalelang e ngotsoeng ke Matheus (12:38-42)
“Mofumahali oa Boroa o tla ema kahlolong le moloko ona.”
Ka nako eo, ba bang ba Bangoli le ba Bafarisi ba araba Jesu ba re: Moruti, re rata ho bona pontšo e tsoang ho uena. Eena a fetola, a re: Moloko o mobe, o khopo, o batla pontšo! Empa pontšo o ke ke oa e nehoa, ha e se ea Moprofeta Jonas. Hobane joaloka ha Jonas a bile ka mpeng ea hlapi e kholo matsatsi a mararo le masiu a mararo, ka mokhoa o joalo Mor’a
motho o tla ba ka mpeng ea lefatše matsatsi a mararo le masiu a mararo.
Banna ba Ninive ba tla ema kahlolong le moloko ona, ‘me ba tla o tsoa, hobane ba ile ba etsa pako ka baka la thuto ea Jonas, empa ho teng mona ea fetang Jonas. Mofumahali oa Boroa o tla ema kahlolong le moloko
ona ‘me o tla o tsoa, hobane o ile a tloha lipheletsong tsa lefatše ho tla utloa bohlale ha Salomone, empa ho teng mona ea fetang Salomone.
