Moeletsi oa Basotho ‘Mantaha
TLHAHISO EA MORENA TEMPELENG
Ho baloa Bukeng ea Moprofeta Malakia. (3:1-4)
“Morena eo le ‘matlang o tla kena tempeleng ea hae.”
Ke sena seo Morena Molimo a se bolelang: Bonang, ke romela leqosa la ka, le tla lokisa tsela ka pel’a ka. ‘Me hang Morena eo le ‘matlang o tla kena tempeleng ea hae. Leqosa la selekane leo le le lakatsang, ke leo, le e-tla, ho rialo Morena oa makhotla.
Ke mang ea ka phelang mohla letsatsi la ho tla ha hae? Ke mang ea ka emang a tiile, h’a hlaha? Hobane o joaloka mollo o hloekisang, ‘me o joaloka sesepa sa lihlatsoi.
O tla lula fatše joaloka ea qhibilihisang ‘me ea hloekisang Silvera; o tla hloekisa bara ba Levi, a ba tšeke joaloka gauda le silvera, ba tle ba hlahisetse Morena nyehelo ka tšoanelo. Ke moo nyehelo ea Juda le ea Jerusalema e tla khahla Morena joaloka mehleng e fetileng le mengoaheng ea boholo-holo.
Pesalema 23
Ke mang Khosi eo e tlotlehang? Ke Morena.
Bulehang, lona mamati, ipuleng ka bolona,
lona mamati a bosafeleng,
ho tle ho kene Khosi e tlotlehang.
Ke mang Khosi eo e tlotlehang?
Ke Morena ea matla ea sa hloloeng,
Morena ea sa hloloeng ntoeng.
Ke mang Khosi eo e tlotlehang? Ke Morena.
Bulehang, lona mamati, ipuleng ka bolona,
Iona mamati a bosafeleng,
ho tle ho kene Khosi e tlotlehang.
Ke mang Khosi eo e tlotlehang?
ke Morena oa makhotla, ke eena Khosi e tlotlehang.
Ke mang Khosi eo e tlotlehang? Ke Morena.
Ho baloa Lengoıong ho Ba-Heberu. (2:14-18)
E ne e le tšoanelo hore a tšoane le bana b’abo ka tsohle.
Bana beso! Ka ha bohle bao Jesu a ba bitsang bana e le batho ba nama le mali, le eena a abeloa botho ka mokhoa o tšoanang le bona, e le hore, ka lefu la hae, a fenye ea nang le borena holim’a lefu, e leng diabolosi, ‘me a lopolle ba neng ba tlanngoe bokhobeng bophelong bohle ba bona, ka baka la ho tšaba lefu. Efela ha se manyeloi ao Jesu a a thusang, empa o thusa ba leloko la Abrahama.
Ka baka leo e ne e le tšoanelo hore a tšoane le bana babo ka tsohle, e le hore, tšebeletsong ea Molimo, e tle e be eena moprista e moholo oa bona, ea tletseng mohau ‘me ea tšepahalang, a tle a lefelle libe tsa sechaba. ‘Me ka ha a ile a utloa bohloko, a ba a lekoa, o na le matla a ho thusa ba lekoang.
Ho baloa Evangeling e halalelang e ngotsoeng ke Luka.
(2:22-40 kapa 22:39-40)
“Jesu o n’a hola, a matlafala, a tletse bohlale.”
Ha matsatsi a tlhoekiso ea Maria a phethahetse ka ho ea ka molao oa Moshe, ba isa Jesu Jerusalema, hore ba mo hlahise ho Morena, [joaloka ha ho ngoliloe molaong oa Morena, ho thoe: Letsibolo le leng le le leng le letona le tla talingoa e le le khethetsoeng Morena; le hore ba fane ka sehlabo sa maebana-khoroana a mabeli kapa malinyane a mabeli a maebana, kamoo ho boletsoeng kateng molaong oa Morena.
‘Me ho n’o le teng Jerusalema monna ea bitsoang Simeone. Motho eo ea lokileng ‘me ea tšabang Molimo, o n’a lebeletse tšeliso ea Israele, ‘me Moea o Halalelang o n’o le ka ho eena. O n’a senoletsoe ke Moea o Halalelang hore a ke ke a bona lefu, a e-s’o bone Kriste oa Morena. O ile a susumeletsoa ke Moea ho tla Tempeleng; ‘me eare ha batsoali ba tlisa ngoana Jesu ho phethahatsa molao mabapi le eena, Simeone a mo sika, ‘me a boka Morena, a re:
Joale, Morena, lokolla mohlanka oa hao a ikele ka khotso, ho ea ka polelo ea hao hobane mahlo a ka a bone pholoho eo u e lokisitseng pontšeng ea lichaba tsohle, leseli la ho bonesetsa lichaba, letlotlo la sechaba sa hao sa Israele.
Ntat’a le ‘m’a ngoana ba ne ba makalla tse neng Ii boleloa ka eena. Simeone a ba hlohonolofatsa, ‘me a re ho Maria, ‘m’ae: Bona, ngoana enoa o behetsoe ho oa le ho tsoha ha ba bangata Israeleng, le ho ba pontšo e tlang ho hanyetsoa, ha e le uena, lerumo le tla hlaba moea oa hao e le hore ho tle ho senoloe mehopolo ea lipelo tse ngata.
Hape ho no ho le teng Anna, moprofeta oa mosali, morali oa Fanoele, oa leloko la Ashere. O n’a s’a holile haholo. O n’a ile a phela le monna oa hae ka lilemo tse supileng hoba a nyaloe, ‘me ea e-ba mohlolohali ho fihlela a le lilemo li mashome a robeli a metso e mene. O n’a sa tlohe Tempeleng, moo a neng a sebeletsa Molimo ka boitimo le ka thapelo nyene le bosiu. A fihla ka eona nako eo, a boka Molimo, ‘me a bua ka ngoana ho bohle ba neng ba lebeletse topollo ea Israele.
Eitse ha ba se ba phethile tsohle ka ho ea ka molao oa Morena, ba boela Galilea, motseng oa habo bona, Nazaretha. Ha e le ngoana, o n’a hola, a matlafala bohlale. Le mahlohonolo a n’a le ho eena.
