Moeletsi oa Basotho Sehopotso sa Pius X ea Halalelang, Mopapa.
Beke ea 20 har’a selemo
Labone
Ho baloa Bukeng ea Baahloli. (11:29-39)
“Motho oa pele ea tla tsoa monyako oa ntlo ea ka ho tla nkhahlanyetsa, ke tla mo nyehela e le sehlabelo sa secheso.”
Matsatsing ao moea oa Morena oa kena ka ho Jefta, ea ileng a haola Gileade le Manasse, a pota le Mitspe e Gileade, ha a tloha Mitspe e Gileade, a fetela naheng ea bana ba Ammone. Jefta a itlama ho Morena ka kano, a re:
Ha eba u ka mpha matla a ho hlola bana ba Ammone motho oa pele ea tla tsoa monyako oa ntlo ea ka ho tla nkhahlanyetsa, mohla ke khutlang ka tlholo naheng ea bana ba Ammone, e tla ba oa Morena, ‘me ke tla mo nyehela e le sehlabelo sa secheso.
Jefta a fetela naheng ea bana ba Ammone ho ea ba futuhela, ‘me Morena a mo fa matla a ho ba hlola. A ba hlola hampe ho tloha Aroere ho isa Minnithe metseng e mashome a mabeli, ho ea kena Abele-Keramime. Ea e-ba tlholo e kholo, ‘me bana ba Ammone ba kokobetsoa ke bana ba Israele.
Eitse ha Jefta a khutlela ha hae Mitspe, eaba morali oa hae o tlil’o mo khahlanyetsa, a hlakisa, a tilinya meropa. E ne e le ngoana a inotši oa Jefta, ea neng a se na leha e le mora kapa morali e mong kantle ho eena.
Ha Jefta a ‘mona, a tabola liaparo tsa hae, a re: Jo! Ngoan’a ka, ua tla ua nkotla pelo! U ntlela ka bomalimabe. Ke se ke ikanne pel’a Morena, ke sitoa ho koeneha. Morali oa hae a re ho eena: Ntate, u ikanne pel’a Morena. U nketse kamoo u baletseng kateng, ha e le moo Morena a u atlehisitse ho iphetetsa holim’a lira tsa hau, bana ba Ammone. A eketsa a re ho Ntat’ae: Ak’u ntumelle ka ntho e le ‘ngoe feela. Mphe khoeli tse peli, nke ke e’o hloahloaela lithabeng, ke llele boroetsana ba ka, ke e-na le thaka tsa ka. A re ho eena: Tsamaea.
A mo fa khoeli tse peli, a ea le thaka tsa hae ho llela boroetsana ba hae lithabeng. Hoba ho fete khoeli tse peli, a khutlela ho ntat’ae, ea ileng a phethisa kano ea hae ka eena.
PESALEMA 39
KE ‘NA EO KE TLA HO PHETHA THATO EA HAU, MORENA.
Ho lehlohonolo motho
ea behang tšepo ea hae ho Morena,
ea sa khemeng le baikhantši le ba sesang leshanong.
Ha u khahloe ke mahlabelo, leha e le linyehelo,
empa u nthibolotse litsebe;
ha u hloke licheso le mahlabelo bakeng la sebe;
KE ‘NA EO KE TLA HO PHETHA THATO EA HAU, MORENA.
ke ha ke re: Ke ‘na eo, kea tla!
Bukeng ho ngotsoe taelo
ea hore ke phethe thato ea hau:
Molimo oa ka, lerato la molao oa hau
le botebong ba pelo ea ka.
KE ‘NA EO KE TLA HO PHETHA THATO EA HAU, MORENA.
Toka ea hau ha kea ka ka ipolokela eona
boinotšing ba pelo ea ka,
empa ke boletse botšepehi ba hau le pholoho ea hau.
Ha kea ka ka patela phutheho e kholo
mohau le ‘nete ea hau.
KE ‘NA EO KE TLA HO PHETHA THATO EA HAU, MORENA.
Ho baloa Evangeling e halalelang e ngotsoeng ke Matheus. (22:1-14)
“Bohle bao le ba fumanang le ba bitsetse moketeng oa lechato.”
Ka nako eo, Jesu a bua le baprista ba baholo le bafarisi ka lipapiso, a re: ‘Muso oa maholimo o tšoantšoa ka morena ea ileng a etsetsa mor’a hae mokete oa lechato. A roma bahlanka ba hae ho bitsa ba neng ba memiloe moketeng, empa bona ba hana ho tla.
A boela a roma bahlanka ba bang, a re: Bolellang bamemuoa: Bonang, ke se ke lokisitse lijo tsa ka tsa mokete, lipholo le linonneng tsa ka li hlabiloe, tsohle li lokile, tlohong moketeng oa lechato. Empa bona ba se ke ba tsota, ba ikela, e mong polasing ea hae, e mong khoebong ea hae; ‘me ba bang ba tšoara bahlanka ba hae, ba ba hlokofatsa, ‘me ba ba bolaea.
Morena a halefa, ‘me a romela makhotla a hae ho ea timetsa babolai bao le ho chesa motse oa bona. Joale a re ho bahlanka ba hae: Mokete oa lechato o lokile, empa ba neng ba memiloe ba ne ba sa tšoanele. E-eang ke hona mateanyetsong a litsela, ‘me bohle bao le ka ba fumanang le ba bitsetse moketeng. Eaba bahlanka bana ba tsoela litseleng, ba phutha bohle bao ba ba fumanang ba babe le ba lokileng, ‘me ntlo ea mokete ea tlala ba lutseng lijong.
Morena a kena ho sheba ba lutseng lijong; a bona teng motho ea sa aparang seaparo sa mokete. A re ho eena: Motsoalle, u kene joang mona, u se na seaparo sa mokete na? Empa eena a thola. Eaba morena o re ho basebeletsi ba hae: Mo tlameng matsoho le maoto, le mo lahlele kantle, lefifing; moo ho tla ba teng lillo le litsikitlano tsa meno.
Efela ba bitsitsoeng ba bangata, empa ba khethiloeng ha ba bakae.
