Moeletsi oa Basotho Beke ea 12 hara’ selemo
Labone
Ho baloa Bukeng ea Genese. (16:1-12.15-16)
“Hagare a tsoalla Abrame mora, ‘me Abrame a reha mora eo lebitso la Ishmaele.”
Matsatsing ao, [Sarai, mohats’a Abrame, o n’a sa mo tsoalla bana; o n’a e-na le lekhabunyane la mo-Egepeta, le bitsoang Hagare. Sarai a re ho Abrame: Ak’u bone, Morena o ntimme thari, ak’u etele lekhabunyane la ka, ekaba ke tla fumana bana ka eena. Abrame a lumela polelo ea Sarai.
Ha ho s’o fetile lilemo tse leshome, Abrame a ahile naheng ea Kamaana Sarai, mohats’a hae a nka lekhabunyane la hae Hagare mo-Egepeta, a mo neha Abrame monna oa hae hore e be mosali oa hae. Abrame a etela Hagare, ‘me a emola; ha Hagare a bona hore o emotse, a nyelisa mofumahali. Eaba Sarai o re ho Abrame: Tlhomphollo eo ke e fumanang e ke e oele uena holimo! Ke u lumeletse ka lekhabunyane la ka, ‘me ke mona, ha le bona hore le emotse, ke se ke nyeliseha mahlong a lona. Morena e be moahloli pakeng tsa rona le uena!
Abrame a re ho Sarai: Lekhabunyane la hau ke leo, le matleng a hau, etsa ka lona kamoo u ratang kateng. Eaba] Sarai o hlorisa lekhabunyane la hae, la ba la mo thobela. Lenyeloi la Morena la le fumana felleng, selibeng se tseleng ea Shure. La re: Hagare, lekhabunyane la Sarai, u tsoa kae, ‘me u ea kae? Hagare a re: Ke thobetse Sarai, mofumahali oa ka. Lenyeloi la Morena la re ho eena: Khutlela ho mofumahali oa hau, u ikokobetse tlas’a hae. Lenyeloi la Morena la boela la re ho eena: Ke tla atisa litloholo tsa hau haholo, hoo ho seng ea ka li balang.
Lenyeloi la Morena la eketsa ka ho re: Ua bona, u emotse, u tla tsoala mora, u mo rehe lebitso la Ishmaele, hobane Morena o utloile tsa ho hlorisoa ha hau. Ha e le eena e tla ba monna ea kang moulo o hlaha; o tla loantša bohle, ‘me bohle ba tla mo loantša, ‘me o tla aha thoko le bana babo kaofela.
Hagare a tsoalla Abrame mora, ‘me Abrame a reha mora eo a mo tsoaletsoeng ke Hagare, lebitso la Ishmaele. Lilemo tsa Abrame li ne li le mashome a robeli a metso e tšeletseng, ha Hagare a mo tsoalla Ishmaele.
PESALEMA 105
BOKANG MORENA, HOBANE O MOLEMO.
Bokang Morena, hobane o molemo,
mohau oa hae ke o sa feleng.
Ke mang ea ka bolelang liketso tse matla tsa Morena,
Ke mang ea ka tumisang thoriso ea hae ka ho tlala?
BOKANG MORENA, HOBANE O MOLEMO.
Ho lehlohonolo ba phethang tse tšoanelang,
ba etsang tse lokileng ka nako tsohle.
U re hopole, Morena,
ha u bontša lerato la hau ho sechaba sa hau.
BOKANG MORENA, HOBANE O MOLEMO.
U re etele ka pholoho ea hau,
re tle re bone lehlohonolo la bakhethuoa ba hau,
re be le kabelo thabong ea sechaba sa hau,
re ithorise ‘moho le ba lefa la hau.
BOKANG MORENA, HOBANE O MOLEMO.
Ho baloa Evangeling e halalelang e ngotsoeng ke Matheus. (7:21-29)
“Ntlo e ahiloeng holim’a letlapa le ntlo e ahiloeng lehlabatheng.”
Ka nako eo, Jesu a re ho barutuoa ba hae: Ha se ka ho re Morena, Morena, ho tla kenoa ‘musong oa maholimo, empa ho tla kenoa ka ho etsa thato ea Ntate ea maholimong. Tsatsing leo ba bangata ba tla re ho ‘na: Morena, Morena, na ha rea ka ra profeta ka lebitso la hau? Na ha rea ka ra etsa mehlolo e mengata-ngata ka lebitso la hau? Mohlang oo ke tla ba bolella pepeneneng, ke re: Ha kea ka ka le tseba le khale; tlohang ho ‘na, lona ba etsang bokhopo.
Ha ho le joalo, mang le mang ea utloang mantsoe ana a ka, ‘me a a phetha, o tla tšoantšoa ka monna ea bohlale, ea ahileng ntlo ea hae holim’a letlapa. Pula ea na, liphororo tsa matha, meea ea foka, ‘me ea khahlela ntlo eo; empa ha ea ka ea oa; hobane e ne e thehiloe holim’a letlapa.
Athe mang le mang ea utloang mantsoe ana a ka, ‘me a sa a phethe, o tla tšoantšoa ka monna ea sethoto, ea ahileng ntlo ea hae lehlabatheng. Pula ea na, liphororo tsa matha, meea ea foka, ‘me ea tsukutla ntlo eo, eaba ea oa, ‘me ho oa ha eona ea e-ba ntho e tšabehang.
Eitse ha Jesu a se a qetile lipolelo tseo, matšoele a tsota thuto ea hae; hobane o ne a ba ruta joaloka ea nang le matla, e seng joaloka bangoli ba bona.
