Tšeliso Thakholi Motlatsi oa ‘Musisi e Moholo oa Banka e Kholo ea Lesotho (CBL), Monghali Lehlomela Mohapi o re moruo oa Naha ea Lesotho o theohile ka 4.5% mathoasong a khoeli ea Pherekhong ka lebaka la khaho ea litsela, tšebetso e fokotsehileng ea tlhahiso ea thepa ka lifemeng le tšebeliso ea lipalangoang. O buile tsena ‘mokeng oa bo-112 oa Komiti ea Maano a Lichelete (MPC) tsa CBL o bileng Lehakoe, Maseru ka la 25 Tlhakubele 2025.
Mohapi o re leha ho theoha ha maemo a moruo ho ntse ho hana ho ea meriting, ho tloha ‘mokeng oa ho qetela oa MPC oo ba bileng le ona nakong ea ho feta, lefatše ka bophara ho ntse ho hlokahala botsitso le bofokoli bo boholo malapeng haholo-holo a nang le likhoebo. O re litheko li nyolohile ka 4.1% ka khoeli ea Hlakola monongoaha ha li ne li tloha ho 3.6% ka Pherekhong. “Sena se bakiloe ke keketseho ea litheko tsa lijo, lino, motlakase le khase.” A rialo a bile a eketsa ka hore ho nyoloha hona ho bakiloe ke khaello e kholo ea poone e tšoeu.
H’a tsoelapele, o re ka Pherekhong 2025 phepelo ea chelete Naha ka bophara e ile ea eketsoa ka 2.5% ka morero oa hore e khutlise keketseho ea 2.4% e tlalehiloeng ka Tšitoe ngoahola. A thatiselletsa ka hore ho theoha hona ho bakiloe haholo ke lintlha tse fetisitsoeng ke Lekala la Khoebo tse bontšang litheko tse tlase tsa bareki le ho fokola ha moruo.
O boetse a tokoboketsa hore litlaleho tsa litšebeletso tsa lichelete tsa ‘muso li bontša hore li ile tsa hakanyetsoa ho 22.1% ea GDP ka Pherekhong 2025, e le ho khutlisa sekhahla sa 0.3% se ileng sa hlokomeleha ka Tšitoe 2024. A re tsena li ile tsa susumetsoa haholo-holo ke lekhetho la SACU, leo e leng lona le ileng la eketsa ka potlako ho feta litšehenyelo. A boela a supa hore mekitlane ea sechaba e theohetse ho 58.0% ho tloha ho 58.4%.
A qetella ka ho bontša hore ka mabaka ana le a mang komiti e entse qeto ea hore sekhahla sa tsoala se sale se ntse se lutse ho 7.25% bakeng sa selemo sena, ha sesiu sa Naha ea Lesotho machabang e le US$105.23 Millione.
