Tšeliso Thakholi Mookameli oa Banka e Kholo ea Lesotho (CBL), Dr. Maluke Letete o re bona e le CBL ‘moho le balekane ba bona tšebetsong ea tšebeliso ea lichelete hara tse ling tse ngata ba itlamme hore ba tla fa sechaba sa Basotho boeletsi litabeng tsa tšebeliso ea lichelete le phano ea litšebeletso tse hloekileng tse se nang bolotsana litabeng tsa lichelete.
Tsena o li buile moketeng oa ho khakola khoeli ea chelete o bileng khubung ea Toropo ea Hlotse Seterekeng sa Leribe ka la 20 Tlhakubele monongoaha moo a hlaloselitseng sechaba se neng se phuthehile ka bongata hore khoeli ena ea chelete ke ea tse ling tsa ponahatso ea boitlamo ba bona.
Letete o re ho bohlokoa hore sechaba sa Basotho se inahane ka mokhoa o tebileng hore na lichelete tseo se nang le tsona se ka li sebelisa joang molemong oa ho ntšetsa Naha ea Lesotho pele. A re ho boetse ho bohlokoa hore se lule fatše ho inahana ka bokamoso ba Lesotho hore na lichelete tse teng, leha li fokola ba ka li sebelisa joang kholisong ea eona. “Taba ena e bohlokoa hobane ha re tsebe hore na bokamoso ba rona re le Basotho bo eme hokae, ka lebaka la qholotso e bonahalang re e-na le eona e bakoang ke linaha tsa Bophirima.” O boletse joalo.
H’a tsoelapele o re ho bonahala matsatsing ana, sechaba nakong eo se sebelisang lichelete se etsa liqeto se le tlasa mehopolo e phahameng haholo, e kang litaba tsa lipolotiki, se sa ela hloko hore na ke lintho life tsa bohlokoa tseo se batlang hore se li fihlele qetellong. “Taba ena e re ho rona ha re inahaneng ka botelo re le sechaba ha re sebelisa lichelete.” O boletse joalo.
Letete o boetse a hlokomelisa sechaba ka ho boloka lekunutu li-account tsa bona le thepa ea libanka, e se re ba oela lerabeng la baqhekanyetsi ba khopo ba utsoang lichelete tsa sechaba ka sehloho le ka lonya. O re morao tjena ho na le bosholu bo hlabisang lihlong ka nako e ‘ngoe tabeng tsa marang-rang ka batho ba nkang monyetla ka batho ba sa tsebeng ho a sebelisana. A ipiletsa ho sechaba ho ela hloko litaba tsena tsa bosholu, moo ho ntseng ho jeoa lichelete tsa bona ka sehloho. A ba kopa hore moo ba nang le khoao litabeng tsena tsa lichelete ba tlalehele sepolesa kapa banka ho fumana thuso.
Lebitsong la batsamaisi ba lichelete ka marang-rang Mofumahali ‘Maleseli Mohapinyane o thoholelitse CBL ka bohato bona boo e bo nkileng ba ho tla ruta sechaba ka bohlokoa ba tšebeliso ea chelete le ho tla se beha leseling ka mafapha a ‘nete ao ba a ka sebelisang molemong oa ho boloka lichelete tsa bona ka tsela e nang le ponaletso.
