Moeletsi oa Basotho Laboraro
MOKETE OA JOSEFA EA HALALELANG, MONYALI OA MARIA MOVIRIGO
Ho baloa Bukeng ea Bobeli ea Samuele. (7:4-5.12-14.16)
“Morena Molimo o tla mo neha terone ea Davida ntat’ae.”
Matsatsing ao, lentsoe la Morena la fihlela Nathane, la re: Tsamaea, u bolelle mohlanka oa ka Davida, u re: Ke sena seo Morena a se bolelang: Mohla nako ea bophelo ba hau e felang, mohla u ithoballang le bo-ntat’ao, ke tla u fa mohlahlami, mora oa hau ea tsoetsoeng ke uena, ke be ke tiise borena ba hae. Ke eena ea tla aha ntlo tlotlisong ea Lebitso la ka, ‘me ke tla tiisa terone ea borena ba hae kamehla le mehla.
Ke tla ba ntat’ae, eena e be mor’a ka. Ntlo ea hau le borena ba hau li tla tiea pel’a ka kamehla; terone ea hau e tla ema kamehla.
Pesalema 88
LESIKA LA HAE LE TLA B’E SA LE LE LE TENG.
Morena, ke tla binela mohau oa hau kamehla,
ke tumise ‘nete ea hau
ho tloha molokong ho isa molokong.
Hobane u itse:
Mohau oa ka o etselitsoe ho ba teng kamehla,
‘nete ea ka e tiile joaloka maholimo.
Ke hlabile selekane le mokhethuoa oa ka,
ka hlapanyetsa Davida, mohlanka oa ka,
ka re: Ke tla tiisa lesika la hau kamehla,
le terone ea hau ho tloha molokong ho isa molokong.
O tla re ho ‘na: Ntate,
Molimo oa ka, lefika le mpholosang!
Ke tla ‘maballa mohaung oa ka kamehla,
selekane sa rona le eena e tla ba se tiileng.
Ho baloa Lengolong la Moapostola Paulosi ho Ba-Roma. (4:13.16-18.22)
“A tšepa leha seo a neng a se tšepile se bonahala e-ka se ke ke sa phethahala.”
Pallo ea ho rua lefatše ha ea ka ea etsetsoa Abrahama kapa leloko la hae ka baka la Molao, empa e le ka baka la toka e tsoang tumelong.
Pallo eo e entsoe ka baka la tumelo, hore e tle e be mpho e tsoang mohaung oa Molimo feela. Ka baka leo pallo eo e etselitsoe litloholo tsohle, e seng tse tsoang Molaong feela empa le tsona tse tsoang tumelong ea Abrahama, eo e leng ntat’a rona bohle, joaloka ha ho ngotsoe ho thoe: Ke u entse ntat’a lichaba tse ngata. E, ke ntat’a rona mahlong a Molimo eo a lumetseng ho eena, ea phelisang ba shoeleng, ‘me ea laelang tse e-song ho be teng hore li be teng.
Abrahama, leha seo a neng a se tšepile se bonahala e-ka se ke ke sa phethahala, a tsepa hore e tla ba ntat’a lichaba tse ngata, kamoo a neng a boleletsoe kateng, ha thoe: Litloholo tsa hau li tla ba ngata joalo. Ka baka leo Abrahama a amoheleha ho Molimo e le ea lokileng, ka baka la tumelo ea hae.
Ho baloa Evangeling e halalelangbe ngotsoeng ke Matheus. (1:16.18-21.24)
“Jesu o tla tsoaloa ke Maria.”
Jakobo a tsoala Josefa, monyali oa Maria, eo Jesu ea bitsoang Kriste, a belehiloeng ke eena.
Tsoalo ea Jesu ea e-ba joana: ‘Mae Maria, ha a se a lebelelitsoe ke Josefa, ba e-s’o ka ba phela ‘moho, a fumaneha e le moimana ka matla a Moea o Halalelang. Ere ka ha Josefa, mohats’a hae, a ne a lokile ‘me a sa rate ho mo hobosa a rera ho mo hlala ka lekunutu.
Eare a sa hopotse joalo, lenyeloi la Morena la be le itlhahisa ho eena torong, le re: “Josefa, mor’a Davida, u se ke ua tšaba ho inkela Maria, mohats’ao: hobane se emotsoeng ka ho eena se tsoa ho Moea o Halalelang. O tla beleha mora, eo u tla mo reha lebitso la Jesu, hobane ke eena ea tla pholosa sechaba sa hae libeng tsa sona.”
Josefa, ha a tsoha borokong, a etsa joaloka ha lenyeloi le mo laetse.
