Tšeliso Thakholi 
Sekolo se Seholo sa Machabeng se ketekile bochaba ba merabe e fapakaneng ea sekolo, moketeng o bileng hona sekolong ka la 7 Tlhakubele monongoaha, e le ho tlotla ketekelo ea sehopotso sa Letsatsi la Moshoeshoe I le tl’o ketekeloa Thaba-Bosiu ka la 11 Tlhakubele 2025.
Puisanong le Hlooho ea Lefapha la Lipuo tse Fapakaneng tsa Sekolo, Mofumahali Lerato Shelile o boletse hore ho keteka bochaba ba merabe e fapakaneng, ke pontšo ea hore ho fapakana ka merabe ke eona ntho ea mantlha ea bohlokoa e matlafatsang le ho khabisa likamano tsa batho lefatšeng. “Re sekolo sa machaba moo ho kenang baithuti ho tsoa likanteng tsohle tsa lefatše. Ka hona ho fapakana ha meetlo ke hona ho boetseng ho matlafatsa likamano tsa sekolo sa rona le machaba a mang le lithuto ka kakaretso.” A rialo.
A supa hore mokete ona o boetse o ba thusa ho sheba kahare ho sekolo hore na seabo sa bona ke sefe kholisong ea sona, ‘me ka mefuta ea mekete e kang ena ke hona moo ba ithutang ho keteka bochaba ba merabe e meng, ho amohelana le ho phelisana ka khotso.
Ka ho khetholoha a bontša hore mokete ona ba o matahanya le o moholo o bang Thaba-Bosiu e le ho keteka Letsatsi la Moshoeshoe, ka ho hetla morao, ho kenya karolo ea nalane le ho ikhopotsa moo ba tsoang teng, “empa re ipapisitse le moo re leng teng hona joale e le hore le lintho tse teng tseo re li bonang hona joale ke bona bochaba ba rona.”
E mong oa baithuti Thandiwe Mokonyana, o boletse hore ba motlotlo haholo ka mokete ona kaha o ba hopotsa seo ba leng sona, e le sechaba sa Basotho le merabe e fapakaneng eo ba kenang le eona ka sekolong.
A re joalokaha Machabeng e le sekolo sa boemo ba machaba mokete ona o boetse o ba ruta ho amohela mehlobo e meng, ka mekhoa le meetlo ea bona, e le ho qoba ho hatana litorong. “Re boetse hape re ithuta meetlo ea bona. Re motlotlo haholo ka mokete ona.” O boletse joalo. Mokete ona o ketekiloe ka lipapali tsa Sesotho tsa mohobelo, mokhibo, litolobonya, lipina tsa mokopu, lipina tsa meetlo e meng tse kang tsa Spanish Dance, Chinese Instrument le Indian Garba Dance.
