Tšeliso Thakholi Mokhahlelo oa Bobeli oa Morero o Thusang Lihoai tse ntseng li Thuthuha(SADP II) o tšoaretse lihoai tse 106 tsa litereke tse ‘ne tse ka Boroa thupelo ea matsatsi a mahlano, eo sepheo sa eona e leng ho akofisa litaba tsa temo e le khoebo kahar’a Naha ea Lesotho, ka ho ba khahlametsa ka lichelete ho ntlafatsa tlhahiso ea bona ba ipapisitse le maemo a phetoho ea boemo ba leholimo. Thupelo ena e tšoaretsoe Upper Moyeni, Quthing ka la 3 ho isa la 8 Tlhakubele 2025.
H’a bua le baphatlalatsi ba litaba thupelong ena, Ofisiri ea Lekala la Temo le Kanetso ea Lijo le Phepo e Nepahetseng, tlasa Morero oa SADP II o khahlametsang lihoai ka lichelete, Monghali Relebohile Khathibe o hlalositse hore SADP II e tlilo khahlametsa lihoai tse 106 ka tlatsetso ea lichelete tse tlil’o li thusa hore li tsebe ho hlahisa ho ipapisitsoe le mefuta ea lihlahisoa tseo li li etsang, e le hore ba li holise li be boemong ba khoebo.
A re chelete eo ba e fang lihoai e arotsoe ka mekhahlelo e meraro, ‘me mokhahlelong ka mong ba fana ka khahlametso ea 70% ea chelete e hlokoang ke likhoebo tsa bona, e be sehoai sona se itlatsa ka 30%. A re mokhahlelong oa pele ke moo ba khahlametsang lihoai ka chelete e lipakeng tsa M400,000.00 ho isa ho M1.5Millione. “Boholo ba batho bao re ba shebileng mokhahlelong ona ke ba ntlafatsang boleng ba lihlahisoa tsa bona.” A rialo.
A re mokhehlelo oa bobeli ke moo ba khahlametsang lihoai ka chelete e kaalo ka M200,000.00 ho isa ho M400,000.00 e leng tse kenang litabeng tsa tlhahiso moo ba li fang chelete ho ea etsa matsete le ho ntlafatsa tlhahiso ea tsona. A re mokhahlelo oa ho qetela ke moo ba khahlametsang bacha ka chelete e kaalo M240,000.00 ka ho isa ho M300,000.00.
A phethela ka hore sepheo se seholo sa hore ba khahlametsoe ke ho bona hore ba holisa tlhahiso ea bona, e le hore ba tsebe ho ba boemong ba ho fetola temo khoebo. A re e meng ea merero ea SADP II e boetse ke ho bona hore e fokotsa sekhahla sa tse tsoang kantle ho naha, le ho ntlafatsa tlhahiso ea mesebetsi. “Morero ke ho boela re ntlafatsa maemo e le hore Lesotho le se hlole le e-ba le batho ba tlokotsing ea lijo.” Ke Khathibe eo.
Ofisiri ea SADP II ea ntseng a ikarabella Ofising ea Khahlametso ea Lihoai ka Lichelete, Monghali Tankiso Mothae o boletse hore lihoai tse neng li entse likopo tsa ho khahlametsoa ka lichelete li ne li le 627, ‘me ho atlehile feela ba 106 ba litereke tsa Quthing, Mohale’s Hoek, Mafeteng le Qacha’s Nek. Athe ba likereke tse ling ke hona ho ntseng ho hlahlojoa likopo tsa bona mekhahlelong e fapakaneng e kenyeletsang hara e meng e mengata, litokomane tsa bona le ho hlahloba hore likopo tsa bona li fela li nyallana le seo ba se kopileng.
E mong oa bahlahisi ba mefuta e fapakaneng ea meroho ea tlil’o fumana khahlametso ea SADP II, Mofumahali ‘Marethabile Khoarane o boletse hore o tlil’o ntlafatsa khoebo ea hae ka ho eketsa sebaka seo a sebeletsang ho sona, ho kenya matanta bakeng sa lijalo le ho eketsa metsi bakeng sa noesetso. A leboha Morero ka tšehetso ‘me a itlama ho sebetsa ka thata haholo ho ntša naha ea habo bofumeng le tlhokahalo ea mesebetsi.
