Moeletsi oa Basotho Beke ea 8 har’a selemo
Labobeli
Ho baloa Bukeng ea Siraka. (35:1-15)
“Ho boloka molao ho tšoana le ho etsa linyehelo tse ngata.”
Ho boloka Molao ho tšoana le ho etsa linyehelo tse ngata, ho khomarela litaelo ke ho nyehela sehlabelo sa teboho. Ho busetsa mosa ka mosa ho tšoana le ho nyehela phofo e thumisehileng, ho fana ka mpho tsa mohau ke ho nyehela sehlabelo sa tlotliso. Ho furalla bobe ho khahla Morena, ho furalla ho sa lokang ke ho nyehela sehlabelo sa puseletso. Se hlahe kapel’a Morena u sa nka letho, hobane mahlabelo ana a lokela ho etsoa ka baka la taelo ea hae. Ha nyehelo ea ea lokileng e tšoetšoetha mafura aletareng, monko o monate oa eona o nyolohela ho Ea holimo-limo. Sehlabelo sa motho ea lokileng se a amoheleha, se ke ke sa lebaleha le khale.
Tlotlisa Morena ka pelo eohle ea hau, se fokotse lithakangoaha tse tlisoang ka matsoho a hau. Kamehla ha u nyehela limpho, u bontše sefahleho se thabileng, u fane ka karolo ea leshome ea tsohle ka nyakallo. Nyehela ho Ea holimo-limo ka ho ea kamoo a u fileng kateng; mo fe ka pelo eohle ea hau, ka ho ea ka matla a hau.
Hobane Morena oa buseletsa, o tla u buseletsa hasupa. Se ntše tjotjo, a ke ke a e amohela; se itšetlehe ka sehlabelo se sa lokang. Morena ke moahloli, boemo ba motho ha bo re letho ho eena.
PESALEMA 49
EA TSAMAEANG TSELENG EA ‘NETE KE TLA ‘MONTŠA PHOLOHO EA MOLIMO.
Mphutheleng metsoalle ea ka,
e tiisitseng selekane le ‘na ka sehlabelo
Maholimo a phatlalatsa toka ea hae,
hobane Molimo ke eena moahloli.
Mamela, sechaba sa ka, kea bua; uena Israele,
ke hlahisa bopaki bo u tsoang,
‘na Molimo, ke Molimo oa hau.
Ha ke u nyatse ka baka la mahlabelo a hau,
etsoe u nketsetsa licheso kamehla.
Sehlabelo sa hau ho Molimo e be teboho,
u phethe likano tsa hau ho Ea holimo-limo.
Ea ‘nehelang sehlabelo sa teboho oa ntlhompha,
ea tsamaeang tseleng ea ‘nete
ke tla ‘montša pholoho ea Molimo.
Ho baloa Evangeling e halalelang e ngotsoeng ke Mareka. (10:28-31)
“Le tla abeloa halekholo nakong ea joale, hammoho le lihloriso, ‘me nakong e tlang le tla fuoa bophelo bo safeleng.”
Ka nako eo, Peterosi a qala ho bua le Jesu, a re: Bona, rona re tlohetse tsohle, ‘me re u latetse. ‘Me Jesu a araba, a re: Kannete, ke re ho lona, ha ho motho ea tla siea ntlo ea hae, kapa bana babo kapa likhaitseli, kapa ‘m’ae kapa ntat’ae, kapa bana, kapa masimo, ka baka la ka le ka baka la Evangeli, a sa tl’o abeloa halekholo nakong ea joale, matlo, le bana babo, le likhaitseli, le bo-‘m’ae, le bana, le masimo hammoho le lihloriso, ‘me nakong e tlang a fuoe bophelo bo sa feleng. Empa ba bangata ba pele e tla ba ba morao, ‘me ba morao e tla ba ba pele.
