Moeletsi oa Basotho Beke ea 6 har’a selemo
‘Mantaha
Ho baloa Bukeng ea Genese. (4:1-15.25)
“Kaine a tsohela Abele moen’ae matla, a ‘molaea. “
Adama o ile a tseba Eva, mosali oa hae, ea ileng a emola, ‘me a tsoala Kaine, a re: Ke fumane mora ka thuso ea Morena. A boela a tsoala Abele, moen’ae. Abele ea e-ba molisa oa linku, ha Kaine eena a lema mobu. Ha isa-isa, Kaine a nyehela Morena tse ling tse melisoang ke mobu; Abele le eena a mo nyehela matsibolo a mang a mohlape oa hae, le mafura a ‘ona.
Morena a amohela Abele le nyehelo ea hae; empa a se ke a amohela Kaine le nyehelo ea hae. Kaine a halefa haholo, ‘me sefahleho sa hae sa hloenya. Morena a re ho Kaine: U halefetse’ng? Hona sefahleho sa hau se hloentse ke’ng? Ha e ba u etsa hantle, u kebiselitse’ng hloho? Athe ha eba u sa etse hantle, sebe se haufi, se monyako, se talimane le uena, u ne u lokela ho se hlola.
Kaine a re ho Abele moen’ae: A re ke re ee naheng. Ha ba le naheng, Kaine a tsohela Abele moen’ae matla, a ‘molaea. Morena a re ho Kaine: Abele ngoan’eno o kae? Kaine a re: Ha ke tsebe. Ana ke molisa oa ngoan’eso na?
Morena a re: U entse’ng? Utloa mali a ngoan’eno a hoeletsa ho ‘na a le mobung. ‘Me joale, u rohakoe, u be u lelekoe mobung o ileng oa ahlama ho metsa mali a ngoan’eno a tšolotsoeng ke letsoho la hau. Leha u ka lema mobu, o ke ke oa u hlahisetsa tsa oona: u tla ba moleleri le mopapaeli lefatšeng.
Kaine a re ho Morena: Kotlo ea ka e kholo ho feta seo nka se jarang. Ha e le moo u ntelekile mobung ona kaieno, ke tla tlameha ho ipatela uena, ‘me ke tla ba moleleri le mopapaeli lefatšeng: Ka baka lena, mang le mang ea mphumanang o tl’a mpolaea.
Morena a mo fetola, a re: Ruri, ha motho a ka bolaea Kaine, Kaine o tla phetetsoa hasupa. Morena a tšoa ea Kaine ka letšoao hore mang kapa mang ea mo fumanang a se ke a ‘molaea.
Adama a boela a tseba mosali oa hae, ea ileng a tsoala mora, a mo reha lebitso la Setha, a re: Molimo o mphile ngoana e mong sebakeng sa Abele ea bolailoeng ke Kaine.
PESALEMA 49
SEHLABELO SA HAU HO MOLIMO E BE TEBOHO.
Morena Molimo ea matla ‘ohle oa bua,
o epa pitso ea lefatše lohle,
ho tloha Bochabela ho isa Bophirima.
Ha ke u nyatse ka baka la mahlabelo a hau,
etsoe u nketsetsa licheso kamehla.
U na le tokelo efe ea ho bolela melao ea ka,
le ea ho bolelisa selekane sa ka ka molomo oa hau,
uena ea hloileng khalemo,
ea furallang lipolelo tsa ka?
U luletse ho etselletsa ngoan’eno,
u senya ngoan’a ‘m’ao lebitso.
U nts’u etsa tjee ebe u re nka thola?
U hopola hore ke tšoana le uena?
Ho baloa Evangeling e halalelang e ngotsoeng ke Mareka. (8:11-13)
“Moloko ona o kopela’ng pontšo?”
Ka nako eo, Bafarisi ba tla ‘me ba qala ho arabisana le Jesu. Ka ho mo leka, ba kopa ho eena pontšo e tsoang leholimong. Jesu a sisimoha moeeng, a re: Moloko ona o kopela’ng pontšo? Rurí kea le bolella moloko ona o ke ke oa nehoa pontšo.
A ba tlohela, a boela a kena sekepaneng ‘me a tšelela mose oane.
