Tšeliso Thakholi Komishinara ea Komisi e Ikemetseng ea Likhetho(IEC), Dr. Karabo Mokobocho-Mohlakoana, o koetse ka molao thupelo ea matsatsi a mane ea Litsi tsa Tšireletso tsa NSS, LCS, LDF le LMPS e holima litaba tsa tšireletso nakong ea likhetho, e le ho matlafatsa kutloisiso ea litsi mabapi le likhetho, liboka le maemo a hlokang tšireletso nakong ea likhetho. Thupelo ena e bile Mohale’s Hoek ka la 20 ho isa la 23 Pherekehong monongoaha moo litho tse 56 tsa tšireletso li ileng tsa tlotloa ka ho abeloa mangolo.
O qalile pele ka ho lebohela le ho leboha bohle ba bileng teng thupelong ena, ‘me a re litsebo tseo ba li fumaneng ha li na ho tsoela bona feela molemo empa le naha ka kakaretso. A bontša hore likhetho li tšoere matla le ho fa batho maemo ao ba bang li ba tlosang libakeng tseo ba neng ba le ho tsona ho ba isa ho tse holimo. Ka hona ho se fihle maemong a holimo ha se ntho e monate.
“E leng hore mosebetsi ona oo re o sebetsang ke o amohang batho ba bang lintho tseo ba li ratang.” O boletse joalo a bile a etsa tlhokomeliso ho batho bohle hore ba lokela ho ba le kutlosiso e le batšehetsi kapa baetapele ba mekha le makhotla lipolotiki. A re sena se tla thusa hore qetellong bohle ba fihlele kutloisiso e tšoanang ea hore nakong ea likhetho ho na le mohloli le ea hloloang, ‘me ea hlotsoeng a amohele tlholo ho se pelaelo ea letho.
A tiisa hore bona e le IEC ba etsa sohle se matleng a bona ho boloka le ho hlompha melao le melaoana e ba tsamaisang nakong ea likhetho, empa e ‘ngoe ea lintho tse atisang ho sala IEC morao e bakoa feela ke batho ba sa ithuteng hore na lintho tse etsoang li etsoa ka mabaka afe. A qetella ka ho ipiletsa ho litho tsa tšireletso hore haele mona ba se ba thetsane ka mahetla ka sepheo sa ho tla sebetsa ‘moho, le bona e le litho tsa IEC, ba hloka hore ba ke ba ba hlahlelle ka litsebo mabapi le litaba tsa tšireletso litsing tsa bona kaha le bona kutloisiso e fapakane, ‘me sena ka nako e ‘ngoe se baka likhohlano tse sa hlokahaleng.
Lebitsong la barupeluoa, Inspector Itumeleng Mahapa oa Sepolesa sa Lesotho o itse thupelo ena e ba butse mahlo kaha ka eona ba ithutile hore IEC e sebetsa nako eohle e seng ka nako ea likhetho feela. A re ba boetse ba utloisisitse seabo sa Litsi tsa Tšireletso nakong ea likhetho. A qetella ka hore e boetse e matlafalitse tšebelisano ‘moho ea Litsi tsa Tšireletso.
Ke lekhetlo la pele IEC e tšoara thupelo ea mofuta ona, ‘me khothaletso e bile hore e be le barupeli kahare ho Litsi tsa Tšireletso ba tlang ho lula li anetsa thuto mabapi le litaba tsa likhetho ka linako tsohle.
