Tšeliso Thakholi Bana ba Parish ea Maria Mofumahali oa Lefatše, Mazenod ba ile ba keteka Mokete oa Bana ba se nang Molato ba ileng ba bolaoa ka sehloho ke Heroda. Mokete o ile oa qala ka Sehlabelo se Halalelang sa ‘Missa o neng o eteletsoe pele ke mong’a Parish Fr. Patrick Khoaele OMI ka Moqebelo oa la 28 Tšitoe monongoaha.
Khothatsong ea letsatsi leo, e ileng ea etsoa ka bokheleke ke Fr. Khoaele o itse Morena Jesu Kriste o amohetsoe ke bana ba ileng ba tšolla mali a bona, ba sa etsa letho le lebe, ebile ba sa bua letho ho mang kapa mang, ‘me ba eteletse morena oa rona Jesu Kriste pele ho ba bashoela-tumelo ka lebaka la mali a bona a ileng a tšoloha pele ho a hae.
“Ke moo ho ileng ha phethahala se boletsoeng ke Moprofeta Jeremia h’a re; lentsoe le utloahaetse Rama, sello le seboko se seholo ke Rakhele ea llelang bana ba hae, ‘me o hana ho tšelisoa hobane ba timetse.” O boletse joalo a bile a tiisa hore mali a bana ba se nang molato a ile a tšolohela Kriste, qalehong ea bopelo ba hae e leng eena ea tlileng hore mali a hae a tšolohe a tšolohela rona baetsalibe, “empa qalong ea bophelo ba hae mali a mofuta oa mafihlelana-khotla le Kriste a ile a tšoloha ka lebaka la hae.”
H’a qetella khothatso o ipilelitse ho bana ba Parish ea Maria Mofumahali oa Lefatše hore haele mona bana ba ile ba bolaoa ba e-s’o etse sebe, e se eka Moea o Halalelang o ka thusa bana ba Parish hore liketso le lipolelo tsa bona li ba thuse hore ebe baphatlalatsi ba lentsoe la Morena Molimo ba sa ntse ba le banyenyane lilemong. A re mosebetsi oa mantlha oa bona e be ho thusana ho khalemelana ha ho na le ba utloisang ba bang bohloko likolong, ‘mantloaneng, malapeng le papaling. A boela a kopa batsoali ho tataisa bana ka linako tsohle.
“Ka lebaka la bana bana ba bolauoeng ba se na molato re rapella bana bohle ba Parish ea Mazenod hore barupeli le batsoali ba bona ba ba thuse ho rata Kriste kamehla.” Ke Fr. Khoaele eo.
Kamorao ho litšebeletso tsa Missa bana ba ile ba keteka le ho thaba ‘moho. Ba bang ba bana ba bileng teng moketeng ona, bao e neng e le lekhetlo la bona la bobeli ba eba teng ba boletse hore ba ikutloa ba thabile haholo ho ba tla rapela ‘moho le ho tla keteka ‘moho e le bana ba Parish ea Mazenod. Ba re sena se bopa bonngoe le lerato. Ba leboha Fr. Khoaele ka tšebetso ena ea hae e matla.
