Tšeliso Thakholi Setsi sa Kokelo sa Paki se ketekile Letsatsi la Machaba la Lefatše la Toantšo ea HIV/AIDS, ka la 6 Tšitoe monongoaha tlasa mohoo o reng, “Ho tšehetsa le ho potlakisa khatelo-pele mabapi le HIV, e leng bopaki ba khatelo-pele e ntsoeng ea HIV ea thibelo, kalafo le tšepiso ea ho tsoelapele ka boikitlaetso ba rona bohle ho araba litlhoko tse lulang li fetoha ho batho ba HIV/AIDS.”
Litšebetso tsa mokete ona o ileng oa simolla ka mohoanto o ileng oa thakhoha haufi le Sekolo se Phahameng sa Masianokeng, li ne li tšoaretsoe mabaleng a Paki Health Centre, Mazenod. H’a hlalosa sepheo sa keteko ena, Mookameli oa Setsi Sr. Julia Nkunyane o itse malebela ao sechaba se a fumaneng letsatsing la kajeno, mabapi le HIV/AIDS e se e le ho ntlafatsa holima moo se seng se ntse se tseba ka lefu lena, ‘me mosebetsi oa bona e se le ho anetsa molaetsa ho bona ha ba fihla hae.
A re se ileng sa mo qholotsa ho keteka letsatsi lena koano Setsing sa Paki ke hobane a ne a hlokometse hore lipalo tsa batho ba tšoeroeng ke lefu lena li ntse li nyoloha letsatsi ka leng, “haholo-holo Setsing mona ke hona moo ke hlokometseng hore re ntse re e-ba le batho ba bacha, ‘me re ntse re fumana litšoaetso tse ncha nako e kholo le e nyenyane.”
A bontša hore ba ile ba bona ho le bohlokoa hore thuto e ‘ne e fanoe e le hore batho ba tsebe ho ipaballa khahlanong le HIV/AIDS. A ipiletsa ho sechaba ho bua ka lefu lena khafetsa, ba se ke ba le nka e le ntho eo ba seng ba ntse ba e tseba. “Re nke nako eohle e ka re bua ka ntho e ncha, e le hore re tle re tsebe ho baballa bophelo ba sechaba.” Ke Sr. Nkunyane eo.
H’a fana ka puo ea hae lebitsong la baoki Mofumahali Resatšepile Qekisi o boletse hore ho bonahala matsatsing ana re se re batla re lebala hore HIV/AIDS e ntse e le e ‘ngoe ea mafu a ntseng a le teng. “Kea kholoa ka lebaka la lintho tse kang mofetše le lefuba re bonahala e ka re se re tlositse mahlo a rona ho HIV, re se re shebile tsena tse ling.” O boletse joalo a bile a eketsa ka hore ho tloha mathoasong a Pherekhong ho isa ho Pulungoana ke batho ba 118, ba fumanoeng ba e-na le tšoaetso ea HIV ba seng ba qalile ho noa litlhare tsa li-ARV selemong sena. “Hona ho re ho rona HIV e ntse e le teng bo-‘m’e le bo-ntate, ‘me ho ntse ho e-na le batho ba bacha ba ntseng ba fumanoa ba e-na le litšoaetso tse ncha letsatsi ka leng.” A rialo.
A re mabaka a mangata a fapakana a etsang hore litšoaetso li bonahale li phahama, ‘me kahara batho bana ba 118 ba bacha ba babeli ke bana ba ka tlasa ho selemo ba nang le HIV ba tlilo hola ba se ba ntse ba e-na le eona. “Monyetla oa hore ba tlilo tšoaetsa ba bang ha ba ntse ba hola o holimo haholo.” A rialo a bile a ipiletsa ho sechaba ho tsoelapele ho ipeha leseling ka litaba tsa HIV. A tiisa hore setsi se buletsoe batho bohle ho tla fumantšoa tlhabollo ka mekhahlelo e fapakaneng.
E mong oa batho ba phelang le HIV/AIDS, Mofumahali ‘Mammetso Letsoela o ipilelitse ho batho bohle ho se nene batho ba lefu lena kaha e ntse e le batho joaloka bona. “Ntho ena ke ntho e monate re phela le eona. Lefu lena ha le ee holimo le tlase joaloka mafu ana a mang, empa uena o le monga lona oa le laola ka hore fela u noe litlhare tsa hau ka nako.” A etsa tlhokomeliso ho bohle ho itšepahalla ho noa litlhare tsa bona.
