Tšeliso Thakholi Kamor’a hore sehlopha sa Berea Ladies se khutlele hae TY tšiba ho lla tseka mahafing, papaling ea Liki ea Bolo ea Maoto ea Basali(Women Super League), e bileng Lebaleng la Boema-fofane ba Sesole ba Mejametalana, Maseru ka la 1 Tšitoe monongoaha, mokoetlisi oa sehlopha sa Berea Ladies, Monghali Lehloenya Nkhasi o re ho tsoa kotsi ha sethibathibane sa bona se hloahloa e leng Liteboho Tjobe ke le leng la mabaka a ba hlolisitseng ho hapa papali ea bona khahlanong le FC Stoko kaha boholo ba boitokisetso ba papali ea bona ba ne ba e ralile ho tloha ka eena.
Monghali Nkhasi o itse kaha Tjobe o ne a sa tsoa khutla kamora ho ba ka thoko ho sehlopha nako e telele ka lebaka la ho tsoa likotsi, ba ne ba e-na le tšepo ea hore boteng ba hae ba tlilo sebetsa hantle haholo kaha hajoale e sa ntse e le eena sethibathibane se hloahloa se bileng se nang le boiphihlelo. Ka hona ba ne ba thabile haholo h’a boetse a khutlile hape. A re boteng ba hae bo ne bo ile ba tlatsa libapali morolo le tumelo e kholo ea hore ba tlilo hapa papali.
“Re ne re tšepile hore o teng, ‘me sena se tlatsitse libapali ka matla kaha bosieong ba hae nakong ea ho feta re ne re se re hlabiloe lintlha tse tharo. Sena se bolela hore re lokela ho lokisa le lefapha leo la lithibathibane ka Pherekhong, hoba hang ha qala a eba sieo re ba le qholotso e kholo.” O boletse joalo a bile a eketsa ka hore lintlha tseo ba li hlabiloeng ke FC Stoko ke ka liphoso tsa libapali ka bo-nngoe, kaha haele sehlopha ba sebelitse hantle ho latela meralo ea bona e mpile ea e-ba bomalimabe ba ho hloloa ho sebelisa menyetla e mengata eo ba ileng ba e fumana.
A re tahlehelo ena ke sesupo sa hore o tlameha ho ea lokisa sebapali ka ‘ngoe, “hoba lintlha tseo re li hlabiloeng ha se tseo re ka reng ke tse sebelitsoeng ke FC Stoko, empa li bakiloe ke tse ling tsa liphoso tsa libapali tsa rona. Haele sehlopha ka kakaretso re sebelitse hantle ho latela moralo oa rona.” O boletse joalo.
A supa hore thomo ea matlha eo ba e filoeng monongoaha ke hore ba bapale hantle ho feta ngoahola joalokaha ba phethetse liki ba le boemong ba bone lokong. A tiisa hore sena ha se ho bolela hore o lokela ho beha libapali tlasa khatello, empa ba itokisetsa papali ka ‘ngoe kaha ba batla ho ntlafatsa ho feta ngoahola. “Re batla ho ba maemong a boraro kapa a bone lokong selemong sena.” Ke Nkhasi eo.
