Tšeliso Thakholi Lekala la Temo, Kanetso ea Lijo le Phepo e Nepahetseng le ketekile le ho tšoaea Letsatsi la Lefatše la Lijo, ka ho tšoaroa ha lipontšo tsa temo le lijo tsa setereke sa Quthing, motseng oa Ha Koali, Mt. Moorosi ka la 8 Pulungoana monongoaha, tlasa mohoo o reng: “Lijo ke tokelo molemong oa bophelo bo botle le bokamoso bo chabileng.”
H’a bua ketekelong ena Motlotlehi Letsie III o itse bacha ba lokela ho ikakhela ka setotsoana litabeng tsa temo ka mafapha ohle a eona, ka sepheo sa ho itlhahisetsa mesebetsi. A supa hore sechaba sa Basotho bongata ba sona bo ntse bo e-na le thahasello e kholo ea temo, ‘me ba bona bohlokoa ba ho iphepa. A re qholotso e kholo e bonahalang e le teng ke phetoho ea boemo ba leholimo, bo bakang komello, lipula tse ngata ho feta tekanyo le lifefo tseo ka nako e ‘ngoe ebe li senya lijalo, 
litsela, marokho le matlo. A re le hara nakong ena e thata o ntse a leboha le ho khothala ho bona hore lihoai tsa Basotho ha lia inehela, empa li ntse li tsoelapele ho ea masimong ho leka ho hlahisa lijo tseo ba ka iphelisang ka tsona le bana ba bona.
Letona la Temo, Kanetso ea Lijo le Phepo e Nepahetseng, Mohlomphehi Thabo Mofosi o ipilelitse ho Basotho ho tšoarana ka matsoho tlhahisong ea lijo, kaha Rabasotho o se a butse mamati ohle a lefatše ka litaba tsa hae tsa ho etella pele phepo e nepahetseng. A leboha lihoai tsohle ka ho kena ka matla a maholo temong, ‘me a ba khothaletsa ho kena ka matla le temong ea Lehlabula.
Lebitsong la Mokhatlo oa Lijo le Temo(FAO), Monghali Mokitinyane Nthimo o itse ho ke ke ha e ba le lijo ha feela re sa boloke khotso. A re khotso ke khoro ea boiketlo, lijo le ntho e ‘ngoe le e ‘ngoe. A re sepheo se seholo sa Letsatsi la Lefatše la Lijo ke ho etsa tlhokomeliso ho sechaba ka liqholotso tse tobileng phepo e nepahetseng le kanetso ea lijo le ho ba buelella litabeng tsa ho felisa tlala le ho ntlafatsa mehato ea temo e ka thutsang ho hlahisa lijo tse tšereletsehileng tsa boleng.
