Tšeliso Thakholi Tona-Kholo ea Lesotho Samuel Matekane o tlohile kahar’a naha ho leba ‘mokeng oa bacha ba Tikoloho ea Afrika o bitsoang Youth Connekt Afrika, o reretsoeng ho hlahloba menyetla ea matsete a lokisetsang bacha hore ba atlehe ‘marakeng, ka ho arolelana litsebo tseo ba li sebelisang ho ba thusa bokamosong ba bona le ho sebetsana le hore na tsebo e ka atolosoa joang tikolohong eohle. ‘Moka ona o simolotse Motse-Moholo Kagali, Rwanda ka la 8 Pulungoana ‘me o tlilo fela ka la 12 Pulungoana monongoaha.
Polelo e ntšitsoeng ke Ofisi ea Tona-Kholo e bontša hore Youth Connekt Afrika ke sethala sa tharollo ea mathata a bacha ka ho khothaletsa khaho bocha ea tikoloho, karolelano ea litsebo le tšebelisano ‘moho ea tikoloho e le hore ha lilemo li ntse li tsamaea e tle e qetelle e fetohile tikoloho ea bohlokoa ka ho fetisisa ea bacha ba Afrika ea matsapa a tšebelisano ‘moho le matsapa a khoebo.
Polelo e re mohloli o moholo oa Tikoloho ea Afrika ke bacha ba eona, ‘me mohloli ona ha o e-s’o sebelisoe hantle. Ka hona o tobane le qholotso e kholo ea boiphihlelo litabeng tsa thuto, tlhokaholo ea lichelete, litaba tsa bophelo bo botle, tlhokahalo ea menyetla ea mesebetsi le ho tingoa menyetla ea ho iketsetsa liqeto linaheng tsa habo bona.
E supa hore liqholotso tsena ka bo-mong kapa ka kopanelo, li sitisa bacha ho kenya letsoho ka mokhoa o hlakileng e le ho tlisa phetoho kahare ho sechaba, litabeng tsa moruo, lipolotiki le Tikoloho ea Afrika ka kakaretso. E tsoela pele ho bontša hore Youth Connekt Afrika ke bokitlaetso ba Tikoloho ea Afrika, boo sepheo sa bona e leng ho potlakisa ho kenngoa tšebetsong ha Lenaneo la 2063 ka ho hokela bacha ba Afrika bakeng sa phetoho ea moruo ka kakaretso. “E amohetsoe le ho kenngoa tšebetsong ke linaha tse 33 tseo e leng litho tsa Afrika.” Polelo e rialo.
