Tšeliso Thakholi Kamor’a hore Tona-Kholo Samuel Matekane a thakhole ka molao ‘maraka oa Hloma-o-hlomole Seterekeng sa Mohale’s Hoek, o boetse a nehelana ka linku tse 484 ho balisana ba litereke tsa Mafeteng le Mohale’s Hoek ba 44, ba kenyeletsang molisana a le mong oa ngoanana, tšebeletsong e bileng Lebaleng la Peiso ea Lipere, Mohale’s Hoek ka la 1 Pulungoana monongoaha.
Molisana ka mong o abetsoe linku tse ntlafalitsoeng tse leshome tse tšehali le ramo e le ‘ngoe, ka sepheo sa hore ba il’o atisa leruo la bona. Tebello ke hore ha ba tsoalisitse ba tla khutlisa linku tse tharo tse tšehali tse tla fetisetsoa ho ba bang. Ho ea ka Tona-Kholo morero ona oa ‘muso oa ho nehelana ka linku o qalile ngoahola literekeng tsa Leribe, Berea le Butha-Buthe moo a ileng abela balisana linku tse 1,188.
A re moralo ona oa ‘muso oa ho thusa balisana ba libakeng tsa maloting le mesikong ea lithaba ka leruo lena la lihoai tsa boea le bonahala le atlehile haholo. A re taba ea khoebo ka linku e boemong bo holimo haholo ka ‘maraka e bile e na le tlhahiso ea nama. A ipiletsa ho Basotho ho e nkela holimo, etsoe Naha ea Lesotho e se e ntse e tsebahala machabeng ka tlhahiso ea boea ba boleng bo phahameng.
A laea ka thata balisana ho baballa thepa eo ba e fuoeng e le hore e tle e fetole bophelo ba bona le ba sechaba ka kakaretso. “Tsena ha se lijelello banna ba heso ke peo, hore le iqalle likhoebo tsa lona. Ka hona ‘muso o lebeletse hore le be linatla le likoankoetla tseo ka tsona naha ena e ka fetohang”. Ke Tona-Kholo eo.
Letona Ofising ea Tona-Kholo, Mohlomphehi Limpho Tau o itse har’a a mang a manane ao ba sebetsanang le ona ke ho baballa le ho fokotsa bofuma kahare ho naha, tlasa moralo oa Lenane la Phokotso ea Bofuma, e leng hona moo ba ileng ba hloaea hore balisana ba ntlafatsoe ka hore ba fumane mohlape oo e ka bang mtheo oa mohlape o ka ba fetolang barui.
A khothatsa le ho lebohela bohle ba abetsoeng linku hore ke motheo o moholo o tlang ho fetola bophelo ba bona le ba sechaba seo ba phelang le sona. Ka hona a ba kopa ho o tšoara hantle e le hore o tle oba atlehele.
Lebitsong la balisana ba abetsoeng linku Tumisang Ramookho o ile a isa liteboho tse khethehileng ho ‘Muso oa Lesotho ka tšehetso ena e kholo eo ba e fumaneng. A itlama hore ba tla baballa le ho hlokomela thepa ena e le hore e tle e tsebe ho ba tsoela molemo.
