Tšeliso Thakholi Banka e Kholo ea Lefatše ka kopanelo le Letsete la Lefatše la Ntlafatso (IFAD), li ile tsa potoloha le libaka tse tšehetlitsoeng ke Morero oa Ntlafatso oa Lihoai tse ntseng li Thuthuha (SADP), Seterekeng sa Mafeteng ka la 27 Mphalane monongoaha ka sepheo sa ho lekola khatelo-pele ea tšebetso e ntseng e etsoa ke SADP, e le ho ba hlahlella ka malebela ho fenya liqholotso tseo ba kopanang le tsona.
Ho ea ka mohlanka oa Lekala la Temo, Kanetso ea Lijo le Phepo e Nepahetseng ea ikarebellang tlasa Morero o khahlametsang lihoai litabeng tsa temo le phepo e nepahetseng oa SADP Monghali Relebohile Khatibe, SADP e khahlametsa lihoai ka ho thusa ka lithupelo le mekhoa e fapakaneng e kenyeletsang ho ba fa chelete ho ntlafatsa temo ea bona, ho ea boemong ba khoebo le ho hlahisa ba ipapasitse le maemo a pheto-phetoho ea boemo ba leholimo.
A bontša hore bafani ba baholo ba tšehelitseng morero oa SADP ka lichelete oa ho thusa lihoai ka merero e fapakaneng ea temo e kang ea phepo e nepahetseng, noesetso bakeng sa temo le leruo la liphoofolo ke Banka e Kholo ea Lefatše le IFAD, ho tla fana ka botataisi moo mesebetsi e ntseng e etsoa e le ho akofisa merero ea SADP eo e e reretsoeng.
A re bakeng sa morero oo ba khahlametsang lihoai ka chelete-tlatsetso literekeng tse leshome tsa naha, ho ntlafatsa temo ba se ba fihletse lihoai tse ka bang 317, moo ba thusang lihoai ka mokhoa oa noesetso ba se ba khahlamelitse lihoai tse 13, ‘me morero ke ho tla aha matamo a noesetso a leshome e le ho phethela litaba tsa noesetso.
A re mokhahlelong oa phepo e nepahetseng ba se ba phalletse lihoai tse ka bang 14,000, “’me sepheo ke hore ka tšehetso eo re tlil’o e fumana ho bafani re ka ‘na ra eketsa lenane.” Haele litabeng tsa ho qetela tsa morero oa temo ho ipapisitsoe le boemo ba pheto-phetoho ea leholimo, ba se ba thusitse lihloai tse 9,000. A qetella ka hore morero o teng ha joale oa SADP o tlilo fihla pheletsong ka selemo sa 2026.
Lihoai tsa merero ea temo ea meroho, leruo la linku, noesetso le phepo e nepahetseng ba thoholelitse le ho leboha SADP ka tšehetso ea bona kaha sena se ntlafalitse bophelo ba bona le ba sechaba sa Basotho ka kakaretso.
Moifo o neng o eteletse pele baemeli ba Banka ea Lefatše le IFAD ke oa Lekala la Temo, SADP le baphatlalatsi ba litaba. Libaka tse ileng tsa eteloa ke moifo ke sa Ha Bua-Sono sa barupeli-lihoai, polasi ea linku ea Matelile Ha Seeiso, metse e ‘meli ea Ha Mantša ea morero oa phepo e nepahetseng, morero oa noesetso Ha Motamolane le selakha se seholo se thusang bahlahisi ba nama toropong ea Mafeteng.
