Moeletsi oa Basotho Beke ea 30 har’a selemo
Laboraro
Ho baloa Lengolong la Moapostola Paulosi ho Ba-Efese (6,1-9)
“E-bang mafolofolo mosebetsing, joaloka hoja le sebeletsa Morena, e seng batho.”
Lona bana, mamelang batsoali ba lona Moreneng, hobane hona ho lokile. Hlonepha ntat’ao le ‘m’ao; ke oona molao oa pele o nang le pallo e reng: u tle u atlehe ‘me u phele halelele lefatšeng.
Le lona bo-ntat’a bana, le se ke la phephetsa bana ba lona hore ba halefe; le mpe le ba rute molao ‘me le ba khalemele, ka ho ea ka thuto ea Morena.
Lona bahlanka, mamelang beng ba lona ba lefatše ka tšabo le ka hlompho, le ka pelo e ntle, joaloka ha le mamela Kriste. Le se ke la ba sebeletsa ha le bonoa feela, hore le khahlise batho, empa joaloka bahlanka ba Kriste ba etsang thato ea Molimo ka pelo eohle. E-bang mafolofolo mosebetsing, joaloka hoja le sebeletsa Morena, e seng batho; le ntse le tseba hore mang le mang o tla putsoa ke Morena ka baka la molemo ofe le ofe oo a o entseng, leha e ka ba lekhoba kapa motho ea nang le tokoloho.
Le lona, beng, etsetsang bahlanka ba lona joalo. Lesang litšokelo, ‘me le ke le tsebe hantle hore eo e leng Morena oa bona le oa lona o teng maholimong, ‘me ke ea sa eeng ka tšobotsi.
PESALEMA 144
MORENA O TšEPAHALA LIPOLELONG TSOHLE TSA HAE.
Morena, mesebetsi ea hau kaofela e ke e u lebohe,
metsoalle ea hau e ke e u boke.
E ke e phatlalatse tlotla ea puso ea hau,
e ke e bolele matla a hau.
Ho tsebisa bana ba batho matla a hau,
letlotlo le botumo ba puso ea hau.
Morena o tšepahala lipolelong tsohle tsa hae,
o mohau liketsong tsohle tsa hae.
Morena o tšehetsa bohle ba khothometsehang,
‘me o kobolla bohle ba khokhopaneng.
Mahlo a bohle a u lebeletse,
hore u ba fepe ka nako ea teng.
Ho baloa Evangeling e halalelang e ngotsoeng ke Luka. (13,22-30)
“Ho tla tla ba tsoang Bochabela le Bophirimela ba tle Iula lijong ‘musong oa Molimo.”
Ka nako eo, Jesu o n’a feta metseng le metsaneng a nts’a ruta, a le leetong la ho ea Jerusalema. Eaba e mong o re ho eena: Morena, na ba tlang ho pholosoa ke ba seng bakae na? Jesu a re ho bona:
Ikitlaeletseng ho kena ka monyako o patisaneng, hobane kea le bolella, ba bangata ba tla batla ho kena, empa ba sitoe. Hoba mong’a ntlo a eme ‘me a koale monyako, le tla qala ho kokota, le eme kantlę, le re: Morena, u re bulele. Empa o tla le araba, a re: Ha ke tsebe hore na le ba hokae.
Ke moo le tla qala ho re: Re ile ra ja ‘me ra noa le uena; u ile ua ruta mapatlelong a motse oa habo rona. Eena o tla boela a re ho lona: Ha ke tsebe hore na le ba hokae. Tlohang ho ‘na, lona bohle ba entseng bokhopo. Ho tla ba teng lillo le litsikitlano tsa meno, mohla le bonang Abrahama le Isaaka le Jakobo, le baprofeta bohle ba le ‘musong oa Molimo, athe lona le leleketsoe kantle.
Ho tla tla ba tsoang Bochabela le Bophirimela, le Leboea, le Boroa, ba tla lula lijong ‘musong oa Molimo. ‘Me bonang, ba morao e tla ba ba pele, ‘me ba pele e tla ba ba morao
