Nthabeleng Seitlheko ‘Muso oa Lesotho o lokela ho kenya tšebetsong molao o sireletsang batho ba nang le bokooa le ho ema khahlanong le batho ba talimang bao e le batho ba se nang thusokapa ba lula ba ba nonosoa liphallelo kaha taba eo e nyenyefatsa boleng le boiphihlelo ba bona. Litaba tsena li boletsoe ke Ofisiri Lefapheng la Tekano le Bobuelli ba Litokelo tsa Mantlha tsa Batho ba nang le Bokooa (LANFOD) Kopano Tšilonyana, puisanong le Koranta ka la 23 Mphalane monongoaha.
O re batho ba nang le bokooa ba se ke nkoe e le batho ba hlophehileng empa ba kenyeletsoe likarolong tsohle tsa sechaba molemong oa ntlafalo le bophelo bo botle, le litaba tsa boiketsetso tse etsetsoang sechaba ba nkoe e le karolo molemong oa ho ikholla bofumeng etsoe e le batho ba tsebang ho iketsetsa mokhoa oa bophelo.
A re ho lokela ho be le lipehelo tsa hore na batho ba nang le bokooa ba hiroa ho tloha boemong bofe ho ea boemong bofe ka lipehelo tsa lipalo-palo tse tataisoang ke molao hore ba be le boemeli liqetong tseo ba li etsetsoang. O re taba ena e tla ba karolo ea ntlafalo ea molao o kenyeletsang batho bohle kahar’a sechaba liqetong tse kholo le mesebetsing.
H’a joale o itse ba tobane le qholotso ea hore litaba tse ngata ba bona li fetohile kahar’a melao li bile li lieha ho phethahala, e leng se sitisang nt’setsopele le kholo ea bona litabeng tsa tsamaiso. A re Naha ea Lesotho e boemong boo e tlamehang ho etsa tlama-thata ho sireletsa litokelo tsa batho ba nang le bokooa ho qoba har’a litaba tse ling bofuma bo ba tjametseng ka lebaka la ho nenoa le ho se ananeloe kahar’a sechaba.
A re ho bohlokoa hore naha e bone hore batho bohle ba natefeloa ke litokelo tsa bona, le hoja ba nang le bokooa ba hlalosoa ba le tlokotsing ea hore ba na le bobuelelli empa bo fella boemong bo itseng ba liqeto.
O re melao e teng empa boholo e kenngoa tšebetsong le ho etsoa ho sa etsoa liphuputso e le karolo ea ho kenyeletsa litlhoko tsa batho ba nang le bokooa, ka hona ke takatso ea bona ho bona melao e teng e fetoloa e etsoa ho ipapisitsoe le litlhoko tsa batho ba nang le bokoa ho bontša hore le bona b’a ananeleha kahar’a sechaba.
Ho feta mona, o hlalositse hore Naha ea Lesotho e lokela ho kenya tšebetsong litumellano tsa machaba tseo e li tekenelang molemong oa hore litaba tsa batho ba nang le bokooa li ke li phamoleloe holimo. O itse ho fihlela ha joale ‘Muso oa Lesotho kamor’a ho saloa morao ke Mokhatlo oa Lithuso Baneng ke hona o fanang ka tlaleho ea molao oa tšireletso ea batho ba nang le bokooa.
H’a phethela o itse litokelo tsa mantlha tsa batho ba nang le bokooa ke litokelo tseo mang le mang a nang le tsona ho fapakanang ke tlhokomelo le tsela ea katamelo.
E mong oa bacha ba nang le bokooa ba pono Lisebo Balopeli, o itse litokelo tsa mantlha tsa batho ba nang le bokooa li ntse li sa hlokomeloe ka ho nepahala kaha ba ntse ba khetholloa kahar’a mesebetsi nakong ea khiro, empa ba e-na le litsebo le boiphihlelo joaloka bacha ba bang. A re litaba tsa puo le metsamao e ntse e le bothata kahar’a naha hobane le litsela ha li lokisoa ha ho sebetsanoe le ntlafalo ea libaka tseo ba ka tsamaeang ho tsona.
O re taba ena ke khatikelo ea litokelo tsa bona e lokelang ho eloa hloko etsoe ba na le bolokolohi ba motsamao le ba ho fumana litšebeletso joalo ka Mosotho e mong le e mong. A re litokelo li lokela ho akaretsa sechaba sohle eseng li khethe nku ka pere.
