Moeletsi oa Basotho Beke ea 27 har’a selemo
Labohlano
Ho baloa Lengolong la Moapostola Paulosi ho Ba-Galata. (3,7-14)
“Bao e leng ba tumelo ba tla hlohonolofatsoa hammoho le Abrahama ea lumetseng.”
Bana beso! Tsebang hore bao e leng ba tumelo ke bona e leng bana ba Abrahama. Ka ho tseba e sa le pele hore ka tumelo Molimo o tla sitsa bahetene ka ho loka, Mangolo a bolella Abrahama, a re: Lichaba tsohle li tla hlohonolofala ka uena. Ha ho le joalo, bao e leng ba tumelo ba tla hlohonolofatsoa hammoho le Abrahama ea lumetseng.
Bohle ba itšetlehang ka mesebetsi ea Molao ba phela tlas’a thohako, hobane ho ngotsoe, ho thoe: Ho rohakehe mang le mang ea ke keng a phehella ho tsohle tse ngotsoeng bukeng ea Molao ka ho li phetha. Ho totobetse hore ha ho motho ea ka etsoang ea lokileng pel’a Molimo ka Molao, etsoe ho thoe: ea lokileng o tla phela ka tumelo. Joale Molao, ha o itšetlehe ka tumelo. Hobane ho thoe: Ea tla phetha litaelo tseo a tla phela ka tsona.
Empa Kriste o re lopolotse thohakong ea Molao ka ho fetoha ea rohakoang ka baka la rona, kaha ho ngotsoe, ho thoe: Ho rohakehe mang le mang ea fanyehiloeng sefateng. Kriste o entse joalo hore hlohonolofatso ea Abrahama e abeloe balichaba ka Kriste Jesu, re tle re amohele ka tumelo Moea oo re o baletsoeng.
PESALEMA 110
MORENA O HOPOLA SELEKANE SA HAE KA BOSAFELENG.
Ke boka Morena ka pelo ea ka eohle,
sebokeng sa ba lokileng
le moo ho phutheheloang teng.
E meholo mesebetsi ea Morena,
e thahaselloa ke bohle ba khahloang ke eona.
Mesebetsi ea hae ke bokhabane le letlotlo,
toka ea hae e hlola kamehla.
O entse hore tse tsotehang tsa hae li hopoloe
Morena o lereko ‘me o mosa
O file ba mo tšabang lijo,
o hopola selekane sa hae ka bosafeleng.
O bonahalitse matla a mesebetsi ea hae ho sechaba sa hae,
ka ho se neha lefa la lichaba.
Ho baloa Evangeling e halalelang e ngotsoeng ke Luka. (11,15-26)
“Ha ke leleka bademone ka monoana oa Molimo, ruri ‘muso oa Molimo o fihlile ho lona.”
Ka nako eo, ha Jesu a leleka modemone, batho ba bang ba re ho eena: Ke ka Beelzebule, morena oa bademone a lelekang bademone. Athe, ba bang, ka ho mo leka, ba kopa ho eena pontšo e tsoang leholimong. Empa eena ka ho tseba mehopolo ea bona, a re ho bona:
‘Muso ofe le ofe o ikarohantseng likoto o tla timela, ‘me matlo a oona a tla oelana holimo. Joale haeba Satane a arohane ka bo-eena, ‘muso oa hae o ka ema joang, haeba le re ke leleka bademone ka Beelzebule, bara ba lona bona ba ba leleka ka mang? Ka baka leo e tla ba bona baahloli ba lona. Athe ha ke fela ke leleka bademone ka monoana oa Molimo, ruri e tla ba ‘muso oa Molimo o fihlile ho lona.
Ha motho ea matla, , ea hlometseng, a lebela ntlo ea hae, ling tsa hae li lula ka khotso. Empa ha ho ka tla e mong ea matla ho mo feta, eaba oa mo hlola, o tla mo amoha lihlomo tsohle tsa hae tseo a neng a li tšepile, o tla fana ka thepa. Ea sa eeng le ‘na o’a ntoantša, ‘me ea sa bokelleng le ‘na o’a qhalanya.
E ee ere ha moea o litšila o tsoile ho motho, o solle mahoatateng, o nts’o batla phomolo. Ha o sa e fumane, o re: ke tla khutlela ka tlung ea ka, moo ke tsoileng teng, ‘me ha o khutla, o e fumana e fietsoe hantle e bile e khabisitsoe, e be moo o ikelang ho ea batla meea e meng e supileng e mebe ho o feta, ‘me e kene e ahe teng. Litaba tsa motho eo tsa morao li ba mpe ho feta tsa pele.
