Moeletsi oa Basotho Beke ea 27 hara selemo
Laboraro
Ho baloa Lengolong la Moapostola Paulosi ho Ba-Galata. (2,1-2.7-14)
Bana beso! Kamorao ho lilemo tse leshome le metso e mene ka nyolohela Jerusalema le Barnabase, re bile re nkile Tituse. Ka nyoloha ka baka la tšenolo, ka teana le baetapele moo ba leng bang ‘me ka ba hlaloseta Evangeli eo ke e rutang balichaba, e se re mosebetsi oa ka oa hona joale le o fetileng oa fetoha lefeela.
Joale ba utloisisa hore ‘na ke abetsoe ho bolella ba sa bollang Evangeli, joaloka ha Peterosi a abetsoe ho ruta ba lebollo; hobane ea sebelitseng ho Peterosi hore e be moapostola ho ba bollang, o sebelitse ho ‘na hore ke be oa balichaba.
Ha ba se ba tsebile mosebetsi o khethehileng oo ke o abetsoeng, Jakobo le Kefase le Joannes, bao e leng baetapele, litšia tsa kereke, ba re tšoara ka letsoho, ‘na le Barnabase. Re le balekane ra lumellana ka hore rona re tla sebetsa har’a balichaba, ha bona ba sebetsa har’a Bajudi. Ba re kopa feela hore re se lebale mafutsana. Ke ntse ke ikitlaeletsa ho etsa joalo.
Eare ha Kefase a tlile Antioke, ka mo hanyetsa pontšeng, hobane ho ne ho totobetse hore ha a nepa. Efela o n’a nts’a e-ja le balichaba, pele batho ba bang ba tsoa ho Jakobo ba fihla. Empa ho ba batho bao ba fihle, a ikhula ‘me a ikhaohanya le bahetene ka ho tšaba ba lebollo. Bajudi ba bang ba mo etsisa boikhakanyong boo.
Joale, eitse ha ke se ke bone hore ha ba sa latela ‘nete ea Evangeli ka ho otloloha, ka re ho Kefase pela bohle: Ha uena u le mojudi, u phela ka mokhoa oa balichaba, eseng ka sejudi, u ka tlama joang balichaba ho phela ka sejudi na?
PESALEMA 116
EANG KA LEFATšE LOHLE LE PHATLALLETSE LIBOPUOA TSOHLE MOLAETSA OA TABA TSE MONATE.
Rorisang Morena, lona lichaba tsohle,
mo tlotliseng, lona merabe eohle.
Hobane mohau oa hae ho rona o matla,
le ‘nete ea Morena ke e sa feleng.
Ho baloa Evangeling e halalelang e ngotsoeng ke Luka. (11,1-4)
“Morena, u re rute ho rapela.”
Ha etsahala hore Jesu a rapela qalong e ‘ngoe, ‘me ha a qetile, e mong oa barutuoa ba hae a re ho eena: Morena, u re rute ho rapela, joaloka ha Joannes a rutile barutuoa ba hae. Jesu a re ho bona: Ha le rapela le n’o re: Ntate, lebitso la hau le halaletsoe, ‘muso oa hau o tle. U re fe, ka matsatsi ‘ohle bohobe ba rona ba letsatsi le leng le le leng; u re tšoarele libe tsa rona, hobane le rona re tšoarela bohle ba re sitetsoeng: ‘me u se ke ua lumella hore re oele molekong.
