Moeletsi oa Basotho Beke ea 27 har’a selemo
Labobeli
Ho baloa Lengolong la Moapostola Paulosi ho Ba-Galata. (1,13-24)
“A khahloa ke ho senola Mora oa hae ho ‘na, ke tle ke mo bolele har’a lichaba.”
Bana beso! Le utloile metsamao ea ka ea mehleng ea pele, ke sa le thutong ea Bajodi, le kamoo ke neng ke hlorisa Kereke ea Molimo ka ho fetisisa, ke leka ho e felisa; le hore ke ne ke tsoetse pele sejoding, ho feta lithaka tsa ka tse ngata sechabeng sa heso, ke boulela meetlo ea bo-ntate ho feta bohle.
Empa eare ha Ea nkhethileng ke sa le popelong ‘me ea mpitsitseng ka grasia ea hae, a khahloa ke ho senola Mora oa hae ka ho ‘na, ke tle ke mo bolele har’a lichaba ha kea ka ka batla keletso ho motho ofe kapa ofe; le teng ha kea ka ka nyolohela Jerusalema ho bona ba bileng baapostola pele ho ‘na, ka mpa ka ikela Arabia, ka nt’o khutlela Damaseka hape.
Kamorao, hoba ho fete lilemo tse tharo, ka nyolohela Jerusalema ho ea bona Peterosi, ka ba ka lula le eena matsatsi a leshome le metso e mehlano. Ha kea ka ka bona moapostola e mong, ha e se Jakobo, ngoan’a bo Morena. Ha ke le ngolla tsena, ha ke qale leshano; Molimo ke paki ea ka.
Kamorao, ka ea linaheng tsa Siria le Kilikia. Ke ne ka sa tsejoe ka mahlo ke ba likereke tsa Judia tse ho Kriste. Ba ne ba utloile feela ha ho thoe; ea neng a re hlorisa pele kajeno o bolela tumelo eo a neng a leka ho e felisa pele. ‘Me ba ne ba tlotlisa Molimo ka ‘na.
PESALEMA 138
MORENA, NTSAMAISE TSELENG EA HAU EA MEHLA EOHLE
Morena, u ntlhahlobile ‘me ua ntseba,
u tseba leha ke lutse kapa ke ema,
u bona mehopolo ea ka.
U lekantse linako tsa ka
u bona mehopolo ea ka.
U lekantse linako tsa ka
tsa ho tsamaea le ho phomola,
u tsebisisa litsela tsohle tsa ka.
Ke uena ea bopileng litho tsa bokahare ba ka,
ua li kopanya ke sa le popelong ea ‘m’e.
Kea u boka ka baka la limakatso tsa hau,
Mesebetsi ea hau e’a tsoteha.
U tsebile moea oa ka ka ho tlala,
masapo a ka h’a ka a pateha ho uena,
ha ke ne ke ntse ke boptjoa sephiring,
ke ahuoa litho botebong ba lefatše.
Ho baloa Evangeling e halalelang e ngotsoeng ke Luka. (10,38-42)
“Maretha a mo amohela katlung ea hae. Maria o ikhethetse kabelo e ntle.”
Ka nako eo, Jesu a kena motseng o mong. Mosali ea bitsoang Maretha a mo amohela ka tlung ea hae. O n’a e-na le ngoan’abo ea bitsoang Maria, ea neng a lutse maotong a Morena, a mametse lentsoe la hae.
Ha e le Maretha, o n’a tšoarehile haholo ke ho ba sebeletsa. A ba a tla a re: Morena, ha u re letho ha ngoan’eso a ntlohetse ke sebeletsa ke le mong na? Ak’u ‘molelle a nthuse!
Empa Morena a araba, a re ho eena: Maretha! Maretha! Ua ipelaetsa le ho ikhathatsa ka tse ngata ngata; athe ho hlokahala ntho e le ‘ngoe feela. Maria o ikhethetse kabelo e ntle, eo a ke keng a e amohuoa.
