Tšeliso Thakholi Kopano ea Baena ba Setefane ba Deanary ea Mofumahali oa Lefatše, ba simolotse potoloho ea bona ea pele ‘mishoneng oa Maria Mofumahali oa Masabiella, Koro-Koro ka la 25 Phato monongoaha ka sepheo sa ho tsosolosa litho, ho bopa bonngoe le ho kenya letsoho boitjarong ba Kopano le Kereke.
Puisanong le Molula-Setulo oa Deanary Monghali Kali Maiketso o boletse hore tšebetso ena ea ho thakholoa ha polotoho ea limmishone tsa Deanary ea Mofumahali oa Lefatše, e ile ea qala ka Sehlabelo se Halalelang sa ‘Missa, o neng o eteletsoe pele ke Baena ba Setefane, ha e-ba le lipuo le mokete oa lipina e le ho siela Kopano ea Baena ba Setefane ba Mofumahali oa Masabiella mokhoa oa boitjaro le ho kenya letsoho ho thusa Kereke ea habo bona. Ho boetse haeba le senyamo moo ba ileng ba amohela litho tse ncha.
A re sethathong ba ne ba potoloha le limmishone tsa Deanary ea Mofumahali oa Lefatše ka mokhoa oa ho etsa mekete ea lipina, e be pokeletso eohle eo ba etsang ba e sia ‘mishoneng oo ba entseng mokete ho ona molemong oa Kopano le Kereke. A supa hore lekhetlong lena potoloho eo ba e thakhotseng e kenyelelitse har’a tse ling ho tsosolosa mekhathala le ho ntšetsa pele boitjaro ba Kereke kaha e ntse e le leetong la boitjaro ba limmishone le likopano.
A tsoelapele ka ho hlalosa hore potoloho ka bo-eona e tlilo ba thusa haholo ho ba basebeletsi ba kopaneng ‘moho, ba nang le bonngoe kahare ho Deanary ea Mazenod kaha ho ne ho bonahala ba ne ba batla ba qhala-qhalane. “Empa sena se tlilo re thusa hore re kopane khafetsa kaha re se re tlil’o kopana hararo ka selemo, e leng retereteng ea Mariha, e koalang selemo joale eba potolohong.” O boletse joalo.
A re potoloho ena e boetse e tlil’o ba thusa hore ba kopane ka morero oa ho kenya letsoho ho holisa le ho ntlafatsa Kereke ea habo bona. “Re ke re bonahale re le Kopano ea Baena ba Setefane re kenya letsoho litabeng tsa phepo ea baprista ba rona le boitjarong ba Kereke.” A rialo.
A phethela ka hore ke lmimishone tse hlano tsa Deanary ea Mofumahali oa Lefatše tse bileng teng potolohong ena e le St. Peter Cleaver, St. Louis, St. Joseph, Mofumahali oa Lefatše, Out Station ea St. Sebastian le Mofumahali oa Masabiella e neng e amohela baeti. Potoloho e hlahlamang e tlilo ba St. Sebastian ka Mphalane pele ho reterete ea bona e koalang selemo.
Ka lehlakoreng le leng, liqhoku tsa baena ba Setefane ba kileng ba ba teng Komiting e Kholo ea Tikoloho E Kholo ea Maseru ba tsoile letšolo ho phallela bana ba bahloki ka litlhoko tsa sekolo tse keletsang seaparo sa sekolo, lieta, libuka le tse ling, haholo ba shebile basebeletsi le ho tsoelapele ka mosebetsi oa boapostola joaloka moshoela-tumelo eo ba mo latelang e leng Setefane, le ho keteka matsatsi a bona a hlatsuo ho ea ka limmishone tsa bona ho fapakana. Ba ne ba etetse setho sa bona, e leng Adv. Lesaoana Mohale ho keteka ‘moho le eena Maria Mofumahali oa Lefatše ka la 25 Phato monongoaha.
