Moeletsi oa Basotho Beke ea 19 har’a selemo
‘Mantaha
Ho baloa Bukeng ea Moprofeta Ezekiele. (1,2-5.242,1)
“E n’e le pono e kang setšoantšo sa letlotlo la Morena.”
Ka selemo sa bohlano sa kholeho ea Khosi Jehoiakiame, e le la bohlano khoeling ea bona, lentsoe la Morena la fihlela moprista Ezekiele, mor’a Buzi, a le naheng ea Ba-Kaldea, nokeng ea Kebare. Letsoho la Morena la e-ba ho eena.
Eitse ha ke sheba, ha utloahala moea o hlahang Leboea, ‘me ka bona leru le leholo le teetsoe hare ke mollo o halimang le ke khanya, ka hare ho e-na le ho kang libopuoa tse phelang tse ‘ne, tse bonahalang eka li na le sebopeho sa motho.
Ha li ne li tsamaea, ke ne ke utloa lerata la mapheo a tsona e ka la maqhubu a leoatle, eka sealuma sa Ea matla-ohle, eka lerata la sefefo kapa lerata la lebotho. Ha li ne li ema, li ne li phutha mapheo a tsona. Ho ile ha utloahala lerata sethaleng se ka holim’a lihloho tsa tsona. Sethaleng se ka holim’a lihloho tsa tsona, ho ne ho e-na le ntho e kang terone, e kang lehakoe la safire. Kaholimo-limo, teroneng ena, ho n’o lutse ea tšoanang le motho ka sebopeho.
Ho tloha thekeng la hae ho ea holimo, ka bona ho kang koporo e benyang, le ho kang mollo o mo teetseng hare; ho tloha thekeng la hae ho ea tlase, ka bona ho kang mollo le khanya e mo teetseng hare. Khanya ena e mo teetseng hare e n’e ka mookoli o hlahang marung letsatsing la pula. E n’e le pono e kang setšoantšo sa letlotlo la Morena. Ka sheba ‘me ka itihela fatše ka sefahleho.
PESALEMA 148 (1-2.11-14)
MAHOLIMO LE LEFATšE LI TLETSE LETLOTLO LA HÁO.
Rorisang Morena, lona tsohle tse maholimong,
mo roriseng liphahameng.
Mo roriseng, lona manyeloi ‘ohle a hae,
mo roriseng, lona makhotla ‘ohle a hae.
Lona marena a lefatše, le lona lichaba tsohle,
lona mahosana le baahloli bohle ba lefatše,
lona bahlankana le lona baroetsana
lona maqheku le lona ba bacha.
Ba ke ba rorise lebitso la Morena,
hobane lebitso la hae le inotši.
ke lona le phahameng;
botlotlehi ba hae
bo phahametse leholimo le lefatše
Ho baloa Evangeling e halalelang e ngotsoeng ke Matheus. (17,21-26)
“Ba tla ‘molaea empa o tla tsoha. Bana bona ba lokolotsoe lekhethong.”
Ka nako eo, Jesu a bua le barutuoa ba hae ba le hammoho Galilea, a re ho bona: Mor’a motho o s’a tla neheloa liatleng tsa batho, ba tlang ho ‘molaea; empa ka letsatsi la boraro o tla tsoha. ‘Me barutuoa ba soaba haholo.
Ha ba fihla Kafarnauma, ba bokellang lekhetho la Tempele ba tla ho Peterosi, ‘me ba re ho eena: Ana moruti oa lona ha a ntše lekhetho la Tempele? A re, Oa le ntša. Ha a kena ka tlung, Jesu a mo raka, a re: Uena u re’ng, Simone? Marena a lefatše a fumana lekhetho kapa khafa ho bo-mang na? Ho bana ba bona kapa ho melata? Peterosi a araba, a re: Ho melata.
Jesu a re ho eena: Ha ho le joalo bana ba bona ba lokolotsoe lekhethong. Empa hore re tle re se ke ra ba khopisa, e-ea leoatleng ‘me u akhele selope, nyolla hlapi ea pele eo u e tšoasang, e ahlamise, ‘me ka hanong u tla fumana chelete, eo u tla e nka ho ea ntefella le ho itefella.
