Moeletsi oa Basotho MOKETE OA Boiphetolo ba Morena
Labobeli
Ho baloa Bukeng ea Moprofeta Daniele. (7,9-10.13-14)
“Seaparo sa hae se ne se le sesoeu joaloka lehloa.”
Ha ke ntse ke shebile, ka bona ho behoa literone. Mokakala oa matsatsi a lula; seaparo sa hae se ne se le sesoeu joaloka lehloa, moriri oa hlooho ea hae o n’o ka boea bo hloekileng. Terone ea hae e n’e le malakabe a mollo, le mabili a eona e le mollo o tukang. Noka ea mollo e ne e tsoa moo a lutseng, e phalla pel’a hae. Ba likete-kete ba ne ba mo sebeletsa, ba mashome-shome a likete ba ne ba eme pel’a hae. Lekhotla la lula, libuka tsa phetloa.
Ka bona e mong ea kang Mor’a motho a e-tla ka maru a leholimo, a leba ho Mokakala oa matsatsi, a tlisoa ho eena.
A nehoa puso le hlompho le borena; ‘me ba merabe eohle le ba lichaba tsohle, le ba lipuo tsohle ba mo sebeletsa. Puso ea hae ke puso e sa feleng, e ke keng ea feta; ‘me ‘muso oa hae o ke ke oa timetsoa.
Pesalema 96 (1-2.5-6.9 R. 1 le 9)
MORENA KE KHOSI, O OKAMETSE LEFATšE LOHLE.
Morena ke khosi, lefatše le ke le nyakalle,
le tsona lihlekehleke tsohle li thabe.
O potiloe ke maru a matšo-matšo,
toka le molao ke motheo oa terone ea hae.
Lithaba li qhibiliha joaloka boka
pel’a Morena oa lefatše lohle.
Maholimo a phatlalatsa toka ea hae,
‘me lichaba tsohle li bona letlōtlo la hae.
Itiheleng fatše ka pele ho eena,
lona melimo eohle.
Hobane uena, Morena, u Ea holimo-limo,
u okametse lefatše lohle.
U feta hole melimo eohle!
Ho baloa Lengolong la Bobeli la Moapostola Peterosi. (1,16-19)
“Re ile ra utloa lentsoe le tsoang leholimong.”
Baratuoa! Re ile ra le tsebisa matla le ho tla ha Morena oa rona Jesu Kriste e seng ka ho latela litšomo tsa bomenemene, empa ka ho ba lipaki tse boneng tlotleho ea hae.
Hobane o filoe ke Molimo Ntate hlompho le tlotliso, mohla lentsoe le mo tlelang, le e-tsoa Letlõtlong le phahameng, le re: Enoa ke Mora oa ka ea ratuoang, eo ke khahloang ke eena. Lentsoe lena, rõna re ne re le utloe; le ile la tsoa leholimong, ha re ne re e-na le eena thabeng e halalelang.
Hape re na le lentsoe le tiileng ho feta, la baprofeta, leo le etsang hantle ha le le mamela, joaloka hoja e le lebone le bonesang lefifing, ho fihlela bosiu bo e-sa, ‘me naleli ea meso e chabela lipelong tsa lona.
Ho baloa Evangeling e halalelang e ngotsoeng ke Mareka (9,1-9)
“Enoa ke Mor’a ka ea ratehang.”
Ka nako eo, Jesu a tsamaea le Peterosi, le Jakobo le Joannes, a ba isa ba le bang thoko thabeng e phahameng. A fetoha mahlong a bona: Liaparo tsa hae tsa khanya, tsa e-ba tšoeu toaa! ka bosoeu boo ho seng sehlatsoi tlase lefatšeng se ka bo fihlelang. Ke ha ho hlaha Elia le Moshe ‘me ba bua le Jesu.
Eaba Peterosi o re ho Jesu: Moruti, ho monate ha re le mona. E-re re hlome maphephe a mararo, le leng e be la hao, le leng la Moshe, le leng la Elia. O n’a timeletsoe ke seo a ka se buang, kaha ba ne ba tšohile haholo. Leru la fihla la ba haeletsa ‘me lentsoe la tsoa lerung la re: Enoa ke Mor’a ka ea ratehang: le mo mamele!
Ha ba re ba qamaka, ba se ke ba hlola ba bona motho, ha e se Jesu a inotši. Ha ba ntse ba theoha thabeng, Jesu a ba laea hore ba se ke ba bolella motho tseo ba li boneng, ho fihlela Mor’a Motho a tsoha bafung. Ba fetse ba mamela taelo eo, leha ba ne ba ntse ba botsana hore na ho tsoha bafung ke ho re’ng.
