Moeletsi oa Basotho Beke ea 16 har’a selemo
Labotšelela
Ho baloa Bukeng ea Moprofeta Jeremia. (7, 1-11)
“Na Ntlo ee e bitsoang ka ‘na ke lehaha la masholu mahlong a lona?”
Lentsoe le fihletseng Jeremia le e-tsoa ho Morena, ke lena: Ema monyako oa Tempele ea Morena, teng u phatlalatse molaetsa ona, u re: Mamelang Lentsoe la Morena, lona bohle ba Juda ba kenang ka menyako ena ho tla khumamela Morena. Ke sena seo Morena oa makhotla, Molimo oa Israele a se bolelang: Ntlafatsang metsamao le liketso tsa lona, e le hore ke tle ke sale ke ahile le lona qalong ena.
Le se ke la tšepa lipolelo tse thetsang tse reng: Tempele ea Morena, Tempele ea Morena, Tempele ea Morena ke eona ena! Ke feela ha le ka la ntlafatsa metsamao le liketso tsa lona, la etsa toka ea ‘nete pakeng tsa motho le mohahabo, ke feela ha le sa hatelle mojaki, khutsana le mohlolohali, ha le sa tšolle mali a se nang molato qalong ena, le sa ipiletse bomalimabe ka ho sala melimo esele morao, ke tlang ho sala ke ahile le lona qalong ena, naheng eo ke e fileng bo-ntat’a lona ho tloha khale ho isa khale.
Empa ke moo le ntseng le tšepile lipolelo tse thetsang tsa lefeela. Le re le ka utsoa, la bolaea, la feba, la hlapanya ka bohata, la chesetsa Baale mokubetso, la sala melimo esele, eo le sa e tsebeng, morao, le nt’o tla ema ka pel’a ka, ka tlung ee e bitsoang ka ‘na, le re: “Re pholohile”, le ntse le tsoela pele ho etsa tse nyonyehang tsee kaofela! Na Ntlo ee e bitsoang ka ‘na ke lehaha la masholu mahlong a lona? Le elelloe hore le ‘na kea bona, ho rialo Morena.
PESALEMA 83
E RATEHA HAKAKANG MEAHO EA HAU, MORENA OA TSOHLE.
Moea oa ka o hlolohetsoe
mabala a tempele ea Morena, hoo nka ‘nang ka shoa;
pelo le litho tsohle tsa ka li hoeletsa ka thabo
ho Molimo ea phelang.
Esita le serobele se iphumanetse lehae,
le lefokotsane ntloana,
eo le behang malinyane a lona ho eona,
haufi le lialetare tsa hau, Morena oa tsohle,
Khosi ea ka le Molimo oa ka.
Ho lehlohonolo ba lulang ka tlung ea hau,
ba u rorisang ba sa khaotse.
Ho lehlohonolo batho bao uena u leng matla oa bona;
ba matlafala ho-ea-ho-ile.
Ruri letsatsi le le leng mabaleng a hau
le feta a sekete bakeng se seng.
Ke ikhethela ho ba monyako oa Ntlo ea Molimo oa ka,
ho e-na le ho lula metlotloaneng ea ba khopo.
Ho baloa Evangeling e halalelang e ngotsoeng ke Matheus. (13, 24-30)
“Li leseng li hole hammoho ho fihlela kotulo.”
Ka nako eo, Jesu a behela matšoele papiso e ‘ngoe, a re: ‘Muso oa maholimo o ka tšoantšoa ka motho ea neng a jetse peo e ntle tšimong ea hae. Eare ha batho ba robetse, ha tla sera sa hae, sa jalella mofoka holim’a koro, sa nt’o ikela. Eare ha lekhaba le se le metse, le bile le tsoetse, ea eba moo mofoka le oona o hlahellang. Joale bahlanka ba mong’a tsimo ba tla ho eena, ba re: Monghali, ana ha ua jala peo e ntle tšimong ea hau na? Joale mofoka e o nkile kae? A re ho bona: Hona ho entsoe ke sera. Bahlanka ba re ho eena: Ha ho le joalo, na u rata hore re e’o o fothola? A re: Che, esere ha le fothola mofoka, la o fotholella le koro. Li leseng li hole hammoho ho fihlela kotulo. Joale ka nako ea kotulo ke tla re ho bakotuli: Qalang ka ho fothola mofoka, le o tlame mangata, le o chese. Koro eona le e bokelle molikong oa ka.
