Moeletsi oa Basotho Beke ea 16 har’a selemo
Labone
mokete oa Jakobo ea Halalelang, Moapostola
Ho baloa Lengolong la Bobeli la Moapostola Paulosi ho Ba-Korinthe. (4, 7-15)
“Ea tsositseng Jesu bafung o tla re tsosa, ‘me o tla re beha haufi le eena, hammoho le lona.”
Bana beso! Monono ona, o ka ho rona joaloka ha o le ka lipitseng tsa letsopa, ho bontša hore matla ana a maholohali ke a Molimo, ha se a rona. Ka nqa tsohle re hlaheloa ke matšoenyeho, empa ha re imeloe; re tsielehile, empa ha re nyahame lipelo; rea hlorisoa, empa ha rea lahloa; re lihetsoe fatše, empa ha rea timela.
Ka mehla le kahohle, re jere mahloko a lefu la Jesu ‘meleng oa rona, e le hore bophelo ba Jesu le bona bo bonahatsoe ‘meleng ea rona. Efela rona, leha re phela, ha re khaotse ho neheloa lefung ka baka la Jesu, e le hore bophelo ba Jesu le bona bo bonahatsoe ‘meleng ea rona e shoang. Ka mokhoa oo lefu le sebetsa ka ho rona, le bophelo bo sebetsa ka ho lona.
Ere ka ha re e-na le moea o le mong oa tumelo, oo ho ngotsoeng ka oona, ha ho thoe: “Ke lumetse, ka hona ke buile,” le rona re lumetse, ‘me ka baka leo rea bua, re ntse re tseba hore ea tsositseng Jesu bafung o tla re tsosa le rona hammoho le Jesu, ‘me o tla re beha haufi le eena, hammoho le lona.
Tsena tsohle li etselitsoe lona, e le hore lineho ha li ata, li ngatafatse teboho ea ba bangata, tlotlisong ea Molimo.
Pesalema 125 (1-6. R. 5)
BA JETSENG KA MEOKHO BA KOTULA KA LITLATSE.
Ha Morena a khutlisa ba Sione kholehong,
e n’e ke rea lora.
Melomong ea rona ha utloahala litšeho,
le lelemeng la rona mehoo ea nyakallo.
Ke moo har’a lichaba ho ileng ha thoe:
“Morena o ba etselitse tse kholo.”
Ruri Morena o re etselitse tse kholo,
ebile re li thabetse.
Morena, ak’u khutlise ba habo rona kholehong,
joaloka linoka tse phallang tsa boroa.
Ba jetseng ka meokho
ba kotula ka litlatse.
Ba ea ba lla,
ba jere peo tsa bona.
Ba nt’o khutla ka litlatse,
ba jere ngatana tsa bona.
Ho baloa Evangeling e halalelang e ngotsoeng ke Matheus (20, 20-28)
“Senoelo sa ka, le tla se noa.”
Ka nako eo, ‘m’a bara ba Zebedea a tla ho Jesu le bara ba hae, a mo khumamela ho mo kopa ho hong. Jesu a re ho eena: U batla’ng na? A mo araba, a re: E re bara bana ba ka ba babeli ba lule ‘musong oa hao, e mong ka letsohong la hao le letona, e mong ka ho le letšehali.
Empa Jesu a fetola, a re: Ha le tsebe seo le se kopang. Na le ka noa senoelo seo ke tla se noa na? Ba re: E, re ka etsa. A re ho bona: Senoelo sa ka, ke ‘nete, le tla se noa. Empa ha e le ho lula ka letsohong la ka le letona kapa ho le letšehali, ha se ‘na ea ka le nehang hona, ho tla nehoa ba ho lokiselitsoeng ke Ntate.
Ha baapostola ba bang ba utloa hona, ba fella bara ba babeli ba Zebedea pelo. Jesu a ba bitsetsa ho eena, ‘me a re: Lea tseba hore lichabeng marena a rena ‘me ba ka sehlohong ba bontša matla a bona. Ha e le ho lona ho se ke ha e-ba joalo, empa har’a lona ea ratang ho ba moholo e be mohlanka oa lona ‘me ea ratang ho ba oa pele, e be mosebeletsi oa lona, joaloka Mor’a motho ea sa kang a tla ho sebeletsoa, empa ho sebeletsa le ho nehela bophelo ba hae ho ba topollo ea ba bangata.
