Moeletsi oa Basotho Beke har’a selemo
Labotšelela
Ho baloa Bukeng ea Moprofeta Mikea. (2, 1-5)
“Ba tsoela ho hapa masimo pelo, le ho inkela matlo”.
Ho malimabe ba rerang bokhopo, ba nahanang bobe liphateng tsa bona, ba bo phethang ha bosiu bo e-sa, ha eba ba na le matla a ho etsa joalo. Ba tsoela ho hapa masimo pelo, le ho inkela matlo; ba qhekella motho ka ntlo ea hae, le e mong ka lefa la hae.
Ka baka leo, ke sena seo Morena a se bolelang: Mamelang, ke rerile ho jarisa lesika lena bobe, boo le ke keng la bo hlohlolla: le tla sitoa ho tsamaea hlooho li phahame, hobane e tla ba mehla e mebe. Mohlang oo, le tla bineloa likobiso, le bineloe koli-ea-malla e reng: Re hlobolisitsoe tsohle. Masimo a sechaba sa heso a nkuoe, a seheloa ba bang, ha ho ea ka re buseletsang ‘ona, masimo a rona a aroletsoe ba re hapileng.
Ka baka leo, phuthehong ea Morena, ha ho sa tla ba ea ka le sehelang ‘ona ka lotho.
PESALEMA 10 (1-2.3-4.7-8.14. R. 12)
U SE KE UA LEBALA BA HLOPHEHILENG MORENA.
Morena, ke ka baka la’ng u emellang hole hakalo,
u ipatela’ng nakong ea mathata?
Boikhantšong ba hae ea khopo
o hatakela ba hlophehileng:
eka a ka tšoasoa ke mano ao a a lohileng!
Hobane ea khopo o ithorisa
ka litakatso tsa pelo ea hae,
ka meharo ea hae o nyefola ‘me o nyelisa Morena.
O re: Khalefo ea hae e hole koana;
a ke ke a mphihlela ;
Molimo ha a eo”. Boinahano ba hae bo fella mona.
Lehano la hae le tletse litlhapa, mashano le bolotsana,
tlas’a leleme la hae ho runya khathatso le bomalimabe.
O lula a laletse metsaneng,
o bolaea ea se nang molato moo a sa bonoeng,
mahlo a hae a lisitse mohloki.
Athe uena u bona khathatso le tlokotsi,
ua li sheba, ebe u li nkela taolong ea hao.
Mohloki o tšepile uena,
ke uena mothusi oa khutsana.
Ho baloa Evangeling e halalelang e ngotsoeng ke Matheus. (12, 14-21)
“A ba laea hore ba se ke ba mo pepesa, hore ho tle ha phethahale se neng se ile sa boleloa.”
Ka nako eo, Bafarisi ba tsoa, ba ea rera kamoo ba ka timetsang Jesu kateng. Ka ho tseba hoo, Jesu a tloha moo. Ba bangata ba mo latela, ‘me a ba folisa bohle, a mpa a ba laea hore ba se ke ba mo pepesa; hore ho tle ho phethahale se neng se ile sa boleloa ke moprofeta Isaia, h’a re:
Ke eo mohlanka oa ka, eo ke mo khethileng,
Moratuoa oa ka, eo ke khahliloeng ke eena:
ke tla mo sitsa ka Moea oa ka,
‘me o tla phatlalletsa balichaba Tumelo ea ‘nete.
A ke ke a nganga, leha e le ho peroha,
ha ho motho ea tla utloa lentsoe la hae litseleng.
A ke ke a roba lehlaka le tenyetsehileng,
le khoele e kekelang feela ea lebone a ke ke a e tima,
ho fihlela a etsa hore Tumelo ea ‘nete e hlole.
Lichaba tsohle li tla tšepa lebitso la hae.
