Moeletsi oa Basotho Beke ea 11 har’a selemo
Labone
Ho baloa Bukeng ea Siraka. (48,1-15)
“Hoba Elia a nyamele setsokotsaneng, Elisha a tlala moea oa hae.”
Ha hlaha moprofeta ea joaloka mollo, lentsoe la hae le tuka joaloka serumula. A lihela batho tlala, ka cheseho ea hae a fokotsa palo ea bona. Ka taelo ea Morena a koala leholimo, ‘me ha raro a theola mollo ho lona.
U tlotliloe hakakang, Elia, ka limakatso tsa hao! Ke mang ea ka ithorisang ka ho re o tšoana le uena? Uena ea ileng a tsosa motho bafung, ua mo khutlisa Qalong-ea-bafu ka lentsoe la Ea matla-‘ohle; uena ea ileng a hulela likhosi timelong, batho ba tummeng ua ba ketola ho tse butša-butša; uena ea ileng a tlotsetsa likhosi ho phetetsa, le baprofeta ho u hlahlama; uena ea ileng a nkeloa holimo setsokotsaneng sa mollo ka kariki e huloang ke pere tsa mollo.
Ho ngotsoe ka uena hore u tla tla khalema ka nako e behiloeng, ho kokobetsa khalefo ea Morena pele e tuka, ho boelanya ntat’a le mora, le ho tsosa meloko ea Jakobo. Ho lehlohonolo ba u boneng, le ba ithobaletseng leratong la Molimo; le rona re tla phela ruri.
Hoba Elia a nyamele setsokotsaneng, Elisha a tlala moea oa hae. Bophelong ba hae ha ho khosana e kileng ea mo sisinya, ha ho motho ea kileng a ‘meha tlas’a hae. Ha ho letho le kileng la mo sita, le lebitleng setopo sa hae se ne se e-na le matla a boprofeta. Bophelong ba hae o ile a etsa tse hlollang, le kamor’a lefu mesebetsi ea hae e n’e le e tsotehang.
PESALEMA 96 (1-2,3-4.5-6.7. R. 12)
LONA BA LOKILENG, ITHABELENG KA MORENA.
Morena ke khosi, lefatše le ke le nyakalle,
le tsona lihleke-hleke tsohle li thabe.
O potiloe ke maru a matšo-matšo,
toka le molao ke motheo oa terone ea hae.
O eteletsoe pele ke mollo,
o chesang lira tse mo hlahileng ka mahohle.
Maholimo a hae a benya kahohle,
Lefatše lea bona ‘me lea thothomela.
Lithaba li qhibiliha joaloka boka
pel’a Morena oa lefatše lohle.
Maholimno a phatlalatsa toka ea hae,
‘me lichaba tsohle li bona letlotlo la hae.
Ba ke ba tlontlolehe bohle ba sebeletsang litšoantšo,
ba ithorisang ka melimo ea bohata.
Itiheleng fatše ka pele ho eena,
lona melimo eohle.
Ho baloa Evangeling e halalelang e ngotsoeng ke Matheus (6,7-15)
“Lona le rapele joana.”
Ka nako eo, Jesu a re ho barutuoa ba hae: Ha le rapela, le se ke la ea lolo-lolo joaloka bahetene, ba hopolang hore ba tla utluoa ka baka la mantsoe bongata. Lona le se ke la ba etsisa, hobane Ntat’a lona o se a ntse a tseba tseo le li hlokang: pele le mo kopa. Ha ho le joalo, lona, le rapele joana:
Ntat’a rona ea maholimong,
Lebitso la hao le halaletsoe,
‘Muso oa hao o tle,
Thato ea hao e etsoe lefatšeng joaloka leholimong.
U re fe kajeno bohobe ba rona
ba letsatsi le leng le le leng;
u re tšoarele libe tsa rona,
joalokaha le rona re tšoaretse ba re sitetsoeng:
‘me u se ke ua lumella hore re oele molekong
u mpe u re ntše bobeng.
Ha eba le fela le tšoarela batho liphoso tsa bona, Ntat’a lona ea maholimo o tla le tšoarela le lona; athe ha eba le sa tšoarele batho, Ntat’a lona le eena a ke ke a tšoarela liphoso tsa lona.
