Moeletsi oa Basotho Beke ea 10 har’a selemo
Labohlano
Ho baloa Bukeng ea Pele ea Likhosi. (19,9.11-16)
“U ee ho ema pel’a Morena holima thaba.”
Matsatsing ao, ha Elia a le tseleng ea thaba ea Molimo Horebe, a kena lehaheng le leng, a qeta bosiu teng. Eaba lentsoe la Morena le mo fihlela, le re: Tsoa, u ee ho ema pel’a Morena holim’a thaba. Eaba Morena o tlil’o feta. Moea o matla haholo oa tsukutla lithaba, oa patsola mafika ka pele ho Morena; empa Morena o n’a se moeeng oo. Kamora’ moea, ha e-ba le tšisinyeho ea lefatše; empa Morena o n’a se tšisinyehong eo.
Kamora’ tšisinyeho ea lefatše, ha e-ba mollo; empa Morena o n’a se mollong oo. Kạmora’ mollo, ha e-ba le molumo oa moea o mosesane. Ha Elia a utloa molumo oo, a ikoahela sefahleho ka seaparo sa hae, a tsoela kantle, a ema monyako oa lehaha, eaba lentsoe le mo fihlela, le re: U moo ka baka la’ng, Elia?
A re: Ke hobane ke cheseheletse Morena, Molimo oa makhotla, haholo. Bana ba Israele bona ba furaletse selekane sa hao, ba helelitse lialetare tsa hao, ba bile ba bolaile baprofeta ba hao ka sabole. Ke se ke setse ke le mong feela, ebile le ‘na ba batla ho nkamoha bophelo.
Morena a ba a re ho eena: Khutla ka tsela eo u tlileng ka eona, e haolang lefella, o lebe Damaseka. E tle e re ha u fihla moo, u tlotse Hazaele ho ba khosi ea Arame. U tlotse le Jehu mor’a Nimshi, ho ba khosi ea Israele. U b’u tlotse Elisha, mor’a Shafathe, oa Abelemehola, ho ba moprofeta ea tla u hlahlama.
PESALEMA 26 (7-9.13-14. R. 8)
KE BATLA SEFAHLEHO SA HAO, MORENA
Mamela lentsoe la ka, Morena,
ha ke hoeletsa ho uena;
nkhauhele ‘me u nkarabe.
Ha ke e-s’o lebale hore u itse:
Batlang sefahleho sa ka!
Ehlile kea se batla, sefahleho seo sa hao, Morena.
u se ke ua mpatela sona khalefong ea hao,
u se ke ua tebela mohlanka oa hao,
uena mothusi oa ka.
U se ke ua ntahla, leha e le ho mphuralla,
uena Molimo, mopholosi oa ka.
Ke kholoa ruri hore ke tla bona molemo oa Morena
lefatšeng la ba phelang.
Tšepa Morena, u tšoare u tiee;
beta pelo, u tšepe Morena.
Ho baloa Evangeling e halalelang e ngotsoeng ke Matheus. (5,27-32)
“Mang le mang ea talimang mosali ka ho mo lakatsa o se a mo febile pelong ea hae.”
Ka nako eo, Jesu a re ho barutuoa ba hae: Le utloile hore ho ne ho thoe: U se ke ua feba. Empa ‘na kea le bolella, ke re: mang le mang ea talimang mosali ka ho mo lakatsa o se a mo febile pelong ea hae. Joale ha leihlo la hao le letona le u lihela sebeng, le honye, ‘me u le lahlele thoko le uena; hobane ho molemo ho uena ha ho ka timela setho se le seng sa hao, ho e-na le hore ‘mele oohle oa hao o lahleloe liheleng.
‘Me ha letsoho la hao le letona le u lihela sebeng, u le pome ‘me u le lahlele thoko le uena: hobane ho molemo ho uena ha ho ka timela setho se le seng sa hao, ho e-na le hore ‘mele oohle oa hao o ee liheleng.
Hape ho ne ho thoe: Ea hlalang mosali oa hae a mo nehe lengolo la tlhalo. Empa ‘na kea le bolella, ke re: mang le mang ea hlalang mosali oa hae, ha e se ka baka la taba ea bohlola, oa mo febisa, ‘me ea nyalang mosali ea hlaliloeng oa feba.
