Moeletsi oa Basotho Beke ea 10 har’a selemo
Laboraro
Ho baloa Bukeng ea Pele ea Likhosi, (18, 20-39)
“Sechaba sena se ke se tsebe hore uena u Morena, le hore u sokolla lipelo tsa bona.”
Matsatsing ao, Akhabe a bitsa bana bohle ba Israele, a khobokanya le baprofeta thabeng ea Karmele. Elia a fihla a ema ka pel’a sechaba sohle ‘me a re: Le tla qhomela ka mona le ka mane ho fihlela neng? Ha eba Morena ke Molimo, mo saleng morao; ha eba ke Baale, mo saleng morao. Empa sechaba ha sea ka sa mo araba.
Elia a tsoela pele, a re: Ke ‘na feela moprofeta oa Morena ea setseng, athe baprofeta ba Baale ba makholo a mane le mashome a mahlano. Re tlisetseng marole a mabeli a lipoho. Bona ba ikhethele poho e ‘ngoe, ba khabele nama ea eona, ba e behe holim’a patsi, feela ba sa hotetse patsi. Le ‘na ke tla hlaba e ‘ngoe, ke e behe holim’a patsi eo ke sa tl’o e hotetsa. Joale le tla bitsa lebitso la molimo oa lona le ‘na ke bitse lebitso la Morena. Molimo ea tla araba ka ho hotetsa mollo, ke ena eo e leng Molimo!
Sechaba sohle sa re: U nepile. Eaba Elia o re ho baprofeta ba Baale: Ikhetheleng poho e ‘ngoe, le qale pele hobane le bangata, ebe le bitsa lebitso la molimo oa lona, feela le sa hotetse patsi.
Ba nka poho eo ba e tliselitsoeng, ba e hlaba, ba qala ho bitsa lebitso la Baale ho tloha hosasa ho fihlela motšeare, ba re: Oho, Baale, araba thapelo ea rona! Empa ha se ke ha e-ba le molumo leha e le karabo. Ba ne ntse ba qhoma-qhoma, ba pota-pota aletare eo ba e entseng.
Motšeare o moholo Elia ka ho ba soma, a re: Hoeletsang haholo, hobane ke molimo, o tšoarehile ke mabaka, o phathahane, kapa o etile; kapa mohlomong o robetse, o s’a tla tsoha. Joale ba hoeletsaka le ho feta ‘me ka ho ea ka moetlo oa bona, ba itlhaba ka lisabole le ka marumo, mali a ba a tsoa. Motšeare oa mantsiboea, ba qala ho phofa ho fihlela nako eo ho hlahisoang nyehelo ka eona, ho nts’o se molumo, karabo, leha e le ea ba tsotellang.
Eaba Elia o re ho sechaba sohle: Atamelang mona! Sechaba sohle sa atamela. A tsosa aletare ea Morena e neng e helelitsoe. Elia a nka majoe a leshome le metso e ‘meli ka ho ea ka palo ea meloko ea bara ba Jakobo, eo lentsoe la Morena le neng le mo fihletse, la re: Lebitso la hao, u tla ba Israele.
‘Me ka majoe ana, a aha aletare ka lebitso la Morena. A ba a cheka foro ho pota-pota aletare; foro ena e ne e ka nka tekanyo tse peli tsa peo. A aha patsi, a khabela nama ea poho, a e beha holim’a patsi. A re: Tlatsang linkhoana tse ‘ne metsi, le a tšele holim’a sehlabo le patsi. A boela a re: Phetang la bobeli. Ba etsa joalo la bobeli. A re hape: Phetang la boraro. Ba etsa joalo la boraro. Metsi a matha ho pota-pota aletare, le eona foro ea tlala metsi.
Nakong eo ho hlahisoang nyehelo ka eona, moprofeta Elia a atamela, a re: Morena, Molimo oa Abrahama, oa Isaaka le oa Israele, ho ke ho tsejoe kajeno hore ke uena Molimo Israeleng, le hore ke mohlanka oa hao, le hore ntho tsena kaofela ke li entse ka taelo ea hao. Nkarabe, Morena, u arabe thapelo ea ka, sechaba sena se tle se tsebe hore uena, Morena, u Molimo, le hore u sokolla lipelo tsa sona.
Ke moo mollo oa Morena o ileng oa theoha, oa nyametsa sehlabo, le patsi, le majoe, le lerole, oa ba oa monya le metsi a ka forong. Ha sechaba sohle se bona hoo, sa oa ka lifahleho, sa re: Ke Morena eo e leng Molimo, ke Morena eo e leng Molimo!
PESALEMA 15 (1-2.4.5 le 8.11. R. 1)
AK’U MPABALLE, MORENA, HOBANE KE TšABELA HO UENA.
Ak’u mpaballe, oho Molimo,
hobane ke tšabela ho uena.
Ke itse ho Morena: Ke uena Moren’a ka.
Morena, ke uena lefa la ka le mohope oa ka,
ke uena ka sebele ea mpolokelang kabelo ea ka.
Ke ikemiselitse hore e be sa le
ke hopotse Morena kamehla;
ha Morena a le pel’a ka, nke ke ka oa.
Ka hona pelo ea ka e tletse thabo.
moea oa ka o nyakaletse,
le oona ‘mele oa ka o tla lula o phutholohile.
U tla mpontša tsela ea bophelo,
thabo e khaphatsehang e fumanoang ho uena,
le nyakallo e sa feleng,
e fuoang ba lulang pel’a hao.
Ho baloa Evangeling e halalelang e ngotsoeng ke Matheus. (5,17-19)
“Ha kea tla ho felisa, empa ke tlile ho phethahatsa.”
Ka nako eo, Jesu a re ho barutuoa ba hae: Le se ke la hloma e ka ke tlile ho felisa Molao leha e le Baprofeta: ha kea tla ho felisa, ke mpa ke tlile ho phethahatsa. Etsoe ruri kea le bolella, ho fihlela leholimo Ie lefatše li feta, ha ho tlhakunyana leha e le letšoaonyana le tla tloha Molaong, tsohle li e-s’o etsahale. Ka baka leo ea tla tlola e ‘ngoe ea litaelo tsena tse nyenyane, a be a rute batho ho etsa joalo, o tla bitsoa e monyenyane ‘musong oa maholimo. Athe ea tla li phetha, a be a li rute, eena o tla bitsoa e moholo ‘musong oa maholimo.
