Moeletsi oa Basotho Beke ea 9 har’a selemo
Labohlano
Ho baloa Lengolong la Bobeli la Moapostola Paulosi ho Timothi. (3,10-17)
“Bohle ba phelang bophelo bo lokileng ho Kriste Jesu ba tla hlorisoa.”
Moratuoa! U latele thuto ea ka, mekhoa ea ka, merero ea ka. U etsise tumelo ea ka, mamello ea ka, lerato la ka, tiisetso ea ka, lihlorisong le mahlokong a ileng a ntlhahela Antiokia, Ikonia le Listra. Ke tse kaakang litlhoriso tseo ke li mameletseng! Empa Morena a ntoela ho tsona kaofela. Ho joalo, bohle ba ratang ho phela bophelo bo lokileng ho Kriste Jesu ba tla hlorisoa; athe batho ba khopo le bathetsi ba tla ‘ne ba tsoele pele bobeng, ba khelohe ‘me ba khelose ba bang.
Khoramela tseo u li rutiloeng, tseo u li amohetseng ka ho tseba na ea u rutileng tsona ke mang; hobane ho tloha bonyenyaneng ba hao u tsebile Mangolo a Halalelang, a nang le matla a ho u hlalefisa le ho u isa pholohong ka tumelo ho Kriste Jesu.
Mangolo ‘ohle a bululetsoeng ke Moea oa Molimo a na le molemo oa ho ruta, ho nyatsa, ho lokisa liphoso le ho tataisa tseleng ea ho loka, e le hore motho oa Molimo a phethehe, a be a hlalefele mesebetsi eohle e molemo.
PESALEMA 118 (157.160.165.166.168. R. 165)
BA RATANG MOLAO OA HAO MORENA BA NA LE KHOTSO EA ‘NETE.
Ba bangata ba ntlhorisang ‘me ba ntoantšang,
empa ha kea kheloha litemoso tsa hao.
Lentsoe la hao ke ‘nete ka bo-lona,
likahlolo tsohle tsa hao li lokile
‘me ha li na ho fela.
Mahosana a ntlhorisitse ntle le lebaka,
empa ke lentsoe la hao feela
leo pelo ea ka e le tšabang.
Ba ratang Molao oa hao ba na le khotso ea nete,
ha ba na ho khoptjoa ke letho.
Ke tšepile ho pholosoa ke uena, Morena,
‘me ke phetha melao ea hao.
Ke boloka litaelo le litemoso tsa hao,
efela metsamao eohle ea ka e pontšeng ea hao.
Ho baloa Evangeling e halalelang e ngotsoeng ke Mareka. (12,35-37)
“Ba ka bolela joang hore Kriste ke mor’a Davida na?”
Ka nako eo Jesu o n’a ruta ka Tempeleng, a re: Na bangoli ba bolela joang hore Kriste ke mor’a Davida na? Hobane Davida ka sebele sa hae o boletse ka Moea o Halalelang, a re: Morena o itse ho Moren’a ka: Lula letsohong la ka le letona, ho fihlela ke beha lira tsa hao tlas’a maoto a hao. Davida ka sebele sa hae o ‘mitsa morena oa hae. Ha ho le joalo, ke mor’a hae ka mokhoa o joang na? ‘Me letšoele le lengata le ne le mo mamela ka thabo.
