Moeletsi oa Basotho Mokete OA Ketelo ea Maria Movirigo
Ho baloa Lengolong la Moapostola Paulosi ho Ba-Roma (12,9-16)
“Thusanang le balumeli ba leng bohloking, thahasellang ho amohela baeti.”
Bana beso! Lerato la lona le hloke boiketsiso. Le hloee tse mpe, le khomarele tse lokileng. Le ratane ka lerato le mofuthu la bana ba motho. Le hlolisane ka hlomphano. Le se ke la nyebella mafolo-folong, le sebeletse Morena ka Moea o chesehang. E-bang le thabo e tsoang tšepong, le iphapanyetse matšoenyeho, phehellang thapelong. Thusanang le balumeli ba leng bohloking, thahasellang ho amohela baeti.
Lakaletsang ba le hlorisang mahlohonolo; le ba lakaletse mahlohonolo ‘me le se ke la ba rohaka. Thabang le ba thabileng, le lle le ba lang. Nkang bohle ka ho tšoana; le se ke la ikhopolela tse phahameng, le mpe le ipatlele tse eisehang. Le se ke la ikhopola le le bohlale.
PESALEMA 112 (Is 12,2-6. R. 6)
EA HALALELANG OA ISRAELE O HAR’A LONA KA BOTLOTLEHI BA HAE.
Ke eo Molimo ea mpholosang,
ke na le tšepo, ha ke sa tšaba;
hobane matla le thoko ea ka ke Morena,
ke eena pholoho ea ka.
Le tla ikhella metsi ka thabo
lilibeng tsa pholoho.
Bokang Morena, rapelang lebitso la hae,
le tumise liketso tsa hae lichabeng,
le li hopotse hore lebitso la hae le phahame haholo.
Rokang Morena ka lifela, hobane o entse tse kholo,
li ke li tsejoe lefatšeng lohle.
Hooang ka thabo, le etse litlatse,
lona baahi ba Sione,
hobane Ea Halalelang oa Israele
o har’a lona ka botlotlehi ba hae.
Ho baloa Evangeling e halalelang e ngotsoeng ke Luka. (1,39-56)
“Ho ntlhahela kae hore ‘M’a Moren’a ka a tle ho ‘na?”
Ka nako eo, Maria a tloha, a ea maloting ka phakiso, motseng o mong oa Juda. A kena ka tlung ea Zakaria ‘me a lumelisa Elizabetha. ‘Me ha etsahala hore ha Elizabetha a utloa tumeliso ea Maria, ngoana a hlasimolohe popelong ea hae, ‘me Elizabetha a tlala Moea o Halalelang. Eaba o hooa ka lentsoe le matla, o re: U lehlohonolo har’a basali, ‘me ho lehlohonolo tholoana ea popelo ea hao. ‘Me ho ntlhahela kae hore ‘M’a Moren’a ka a tle ho ‘na? Hobane ke mona, hang ha lentsoe la tumeliso ea hao le kena tsebeng tsa ka, ngoana a hlasimoloha ke nyakallo popelong ea ka. Ho lehlohonolo uena ea lumetseng, hobane tseo u li boleletsoeng ke Morena li tla phethahala.
Maria a re: Pelo ea ka e tlotlisa Morena, moea oa ka o thabetse Molimo Mopholosi oa ka. O bone ho eiseha ha lekhabunyane la hae; ho tloha joale meloko eohle e tla mpitsa ea lehlohonolo, hobane Ea matla-ohle o nketselitse tse kholo.
Lebitso la hae lea halalela. Mohau oa hae o aparela ba mo tšabang, ka meloko le meloko. O sebelitse tse matla ka letsoho la hae, o qhalantse ba pelo li ikhohomosang.
O theotse ba matla literoneng, o phahamisitse ba eisehang. Ba lapileng o ba khorisitse tse molemo, ba ruileng o ba tebetse ba se na letho. O thusitse Israele, mohlanka oa hae, a sa lebale ho paka mohau oa hae, joaloka ha a n’a baletse bo-ntat’a rona, Abrahama le litloholo tsa hae ka mehla eohle.
Maria a lula le Elizabetha likhoeli tse batlileng ho ba tharo, a nt’o boela tlung ea hae.
