Nthabeleng Seitlheko Letona la Matla Prof. Nqosa Mahao, o re tšebetso ea LEC ha e jese litheohelang, ka ntle hore ho nkoe likhato tse hlokahalang tšebetsong ea eona e tla tsoalla naha litlamorao tse bolutu. Tsena o li boletse tulong ea Ntlo ea Bakhethoa ka la 26 Tlhakubele monongoaha.
O re ka khoeli ea Pherekhong tlaleho ea Mohlahlobi oa Libuka kapel’a Komiti e lisitseng Tšebeliso ea Lichelete, e supa hore tsamaiso ha e boemong bo botle kahar’a koporasi ena, theko ea thepa e se nang ponaletso e nang le lithahasello, litefiso tse holimo tsa litšebeletso tse fanoang ke likamphani ho koporasi.
A re bothata bo bong ke ba baji ba litšebeletso tsa kamphani ba lefellang litšebeletso ho basebetsi eseng koporasing, litšebeletso tse sa hlakang tsa li polokelo tsa likhoebo, ho se lefelloe ha mekoloto ea theko ea motlakase ho litsi tsa phehlo ea motlakase.
Mahao o bontšitse hore ho tloha ka selemo sa 2023 esale LEC e qalella ho okha motlakase Ha Ramarothole ha e-s’o o lefelle ha e tjametsoe ke mokoloto o hakanyetsoang ho Billione e ntseng e kolotoa setsi sa phehlo ea motlakase sa ‘Muela.
A re ba elelloa hore LEC e hloka ho hlophuoa bocha hore e ntlafale, ho ntlafatsoe le taolo ea tšebetso ea eona ‘me ha ba ntse ba inahanela tlhopho ba lokela ho tseba boemo boo kamphani e leng ho bona le tlhahlobo ‘me boitokisetso ba tšebetso ena bo se bo hatetse pele.
A re lekala la habo le se le fihletse tumellano le Lekala la Lichelete hore le tla lefella liphuputso tsena, tse tla etsoa ke Mohlahlobi e Moholo ‘me qetellong ho tla tsebahala hore na mehato e tla thusa ho hlophisa tsamaiso ea LEC.
Moetapele oa Mokha oa Khoetsa ea Sechaba sa Basotho (PFD), Adv. Lekhetho Rakuoane, o thoholelitse lekala ka tšebetso ena eo le e fihletseng ea hore ho etsoe tlhahlobo e ikemetseng ho koporasi ea motlakase, kaha e tla beha bophelo ba Basotho tsietsing.
A re ho bohloko ho bona Basotho ba lefella litšebeletso empa ba sa fumane tse matla. A re ho hlahlojoa ha koporasi ena ho tla imolla naha mekolotong e se nang thuso joaloka ea ho kolota motlakase e sa o lefelle. A re litlaleho tsa Mohlahlobi e Moholo oa Libuka ha li ka kenngoa ts’ebetsong le makaleng ho ka thusa naha ho imolloha ts’ebetsong tse se nang ponaletso.
