Moeletsi oa Basotho Beke ea 5 ea Paseka
‘Mantaha
Ho baloa Bukeng ea Liketso tsa Baapostola.(14,5-17)
“Molaetsa oo re o tlisang ke hore le lahle masaoana ana, ‘me le sokolohele ho Molimo ea phelang.”
Matsatsing ao, ha hlaha letsoso le leholo la bahedene le la Bajodi Tlõtliso e se nehoe rõna, Morena, ba kopane le marena a bona, hore ba etse Paulosi le Barnabase hampe, ‘me ba ba tlepetse ka majoe. Ha baapostola ba utloa hona, ba balehela metseng ea Likaonia, e leng Listra le Derbe, le tikolohong ea eona. Teng ba bolela Molaetsa oa taba tse monate.
Monna e mong o n’a le teng Listra, ea holofetseng maoto, ea hlahileng e le seritsa, ea neng a sa ka a tseba ho tsamaea le ka mohla. O n’a mamela ha Paulosi a bua. Eitse ha Paulosi a mo talima, a bona hore o na le tumelo ‘me a ka folisoa. A bua ka lentsoe le phefa, a re: Ema ka maoto ‘me u otlolohe. Motho eo a tlolela holimo, a qala ho tsamaea.
Eitse ha matšoele a bona seo Paulosi a se entseng a hooa, a re ka se-Likaonia: Melimo e theohetse ho rõna ka sebopeho sa batho! Ba bitsa Barnabase Zeuse, le Paulosi Hermese, hobane e ne e le eena sebui se seholo. Moprista oa Zeuse, eo tempele ea hae e neng e le kantle ho motse, a tlisa khorong ea oona lipoho tsa likhomo tse khabisitsoeng ka lipalesa. Eena ‘moho le sechaba o n’a rata ho etsetsa baapostola bao sehlabelo.
Empa ha Barnabase le Paulosi ba utloa hoo, ba tabola liaparo tsa bona ‘me ba itahlela har’a letšoele, ba ntse ba hõa, ba re: Banna, le etsa joalo ka baka la’ng na? Le rõna re batho ba shoang, ba ts’oanang le lõna. Molaetsa oo re o tlisang ke hore le lahle masaoana ana, ‘me le sokolohele ho Molimo ea phelang, ea entseng leholimo le lefatše, le leoatle, le tsohle tse ho tsona. Mehleng e fetileng o tlohetse lichaba tsohle hore li itsamaele ka tsela ea tsona. Empa leha ho le joalo, ipaka ka ho etsa tse molemo, a le leholimong, ka ho fana ka lipula le ka linako tsa nala le ka ho etsa hore le khore, ‘me lipelo tsa löna li tlale thabo. Leha ba bua joalo, ba batla ba sitoa ho thibela matšoele ho ba etsetsa sehlabelo.
PESALEMA 113 B (1-4.15-16. R. 1)
TLOTLISO E SE NEHOE RONA, MORENA, EMPA E NEHOE LEBITSO LA HAO.
Tlotliso e se nehoe rõna, Morena,
e se nehoe rona;
empa e nehoe lebitso la hao,
ka baka la mohau oa hao
le ka baka la ‘nete ea hao.
Molimo oa rõna o leholimong,
tsohle tse mo khahlang oa li etsa.
Melimo ea bona ea litšoants’o ke silvera le gauda,
ke mosebetsi oa matsoho a batho.
Le ke le hlohonolofatsoe ke Morena,
ea entseng leholimo le lefatše.
Leholimo lona ke la Morena,
athe lefatše, lona o le nehile bana ba batho.
Ho baloa Evangeling e halalelang e ngotsoeng ke Joannes. (14,21-26)
“’Muelli eo Ntate a tla mo roma, ke eena ea tla le ruta tsohle.”
Ka nako eo, Jesu a re ho barutuoa ba hae: Ea nang le melao ea ka ‘me a e boloka, ke eena ea nthatang. ‘Me ea nthatang o tla ratoa ke Ntate; le ‘na ke tla mo rata ‘me ke tla iponahatsa ho eena.
Judase, e seng Iskariota, empa e mong a re ho eena: Morena ho ea ka’ng hore u tle u iponahatse ho rona, empa e seng ho lefatše na?
Jesu a araba, a re ho eena: Ha motho a nthata, o tla boloka lentsoe la ka; ‘me Ntate o tla mo rata, ‘me re tla tla ho eena, re ahe hammoho le eena. Ea sa nthateng ha a boloke mantsoe a ka. ‘Me lentsoe leo le le utloang, ha se la ka, empa ke la Ea nthomileng, ke la Ntate.
Ke le boleletse tsena ke sa ntsane ke e-na le lona. Empa ‘Muelli, Moea o Halalelang, eo Ntate a tla mo roma ka lebitso la ka ke eena ea tla le ruta tsohle, a be a le hopotse tsohle tseo ke le boleletseng tsona.
