Moeletsi oa Basotho Beke ea 3 ea Paseka
Labohlano
Ho baloa Bukeng ea Liketso tsa Baapostola. (9,1-20)
“Motho eo, ke sejana seo ke ikhethetseng sona ho isetsa balichaba lebitso la ka.”
Matsatsing ao, Saule, ka ha a n’a bipelane ke litšokelo tsa lipolao tsa barutuoa ba Morena, a ea ho moprista e moholo, ‘me a mo kõpa mangolo a ho ea matlung a thapelo a Damaseka, e le hore haeba teng a ka fumana banna le basali ba joalo, a ba tlise Jerusalema ba tlamiloe.
Eare a sa le tseleng, ha etsahala hore, ha a atamela Damaseka, ka nako le motsotso khanya e tsoang leholimong e mo teele hare. Hoba a oele fatše, a utloa lentsoe le reng ho eena: Saule, Saule, u ntlhorisetsa’ng na? Eena a re: U mang, Morena? Lentsoe la re: Ke ‘na Jesu eo u mo hlorisang. Ho thata ho uena ho raha tsenene. Eena a tšohile, a bile a nts’a thothomela, a re: Morena, u rata ke etse eng? Morena a re ho eena: Tsoha, u kene motseng, ‘me teng u tla bolelloa seo u tšoanetseng ho se etsa.
Ha e le banna ba neng ba mo felehelitse, ba ne ba eme, ba hloletsoe, ka ha ba ne ba utloa lentsoe, empa ba sa bone motho. Eaba Saule o tsoha fatše, ‘me leha a re oa sheba, a se ke a bona letho. Ba mo tataisa ka letsoho, ho ea mo fihlisa Damaseka, moo a hlotseng matsatsi a mararo a sa bone, a sa je, leha e le ho noa.
Ho n’o le teng Damaseka morutuoa ea bitsoang Ananiase. Morena a bua le eena ponong, a re: Ananias! Eena a re: ke ‘na enoa Morena! Eaba Morena o re eena: Ema, u ee seterateng se bitsoang Se-otlolohileng, ‘me ka tlung ea Juda, u batle motho ea bitsoang Saule oa Tarse. O ntse a rapela, ‘me o bontšitsoe monna ea bitsoang Ananias a kena, a ‘meha matsoho hore a boele a bone. Ananias a araba, a re: Morena, ke utloile tsa monna eo ka ba bangata, kamoo a entseng bahalaleli ba hao hampe kateng Jerusalema.
Le mona, marena a baprista a mo file matla a ho tlama bohle ba rapelang lebitso la hao. Empa Morena a re ho eena: E-ea hobane motho eo, ke sejana seo ke ikhethetseng sona ho isetsa balichaba, marena le bana ba Israele lebitso la ka. ‘Me ke tla mo bontša hore na o tla lokela ho utloa bohloko hakae ka baka la lebitso la ka.
Eaba Ananias oa ea, o kena ka tlung eo, ‘me o mo beha matsoho, a nts’a re: Saule, ngoan’eso, Morena Jesu, eena ea ileng a ipontša ho uena tseleng eo u neng u e-tla ka eona, o nthomile hore u tl’u boele u bone, ‘me u tlale Moea o Halalelang.
‘Me hang ha oa mahlong a hae ntho tse kang makhakhapa, eaba oa bona. Eare hoba a eme, a hlatsuoa hona hoo. Eitse ha a se a jele, a boela a matlafala. A hlola matsatsinyana le barutuoa ba neng ba le Damaseka, a phakisa ho ruta matlung a lithapelo tsa Bajodi hore Jesu ke eena Mora oa Molimo.
PESALEMA 116 (R. Mk 16,15)
E-EANG KA LEFATšE LOHLE, LE PHATLALLETSE LIBOPUOA TSOHLE MOLAETSA OA TABA TSE MONATE.
Rorisang Morena, lona lichaba tsohle.
mo tlotliseng, lona merabe eohle.
Hobane mohau oa hae ho rona o matla.
le ‘nete ea Morena ke e sa feleng.
Ho baloa Evangeling e halalelang e ngotsoeng ke Joannes. (6,53-60)
“Nama ea ka ke sejo ka ‘nete ‘me mali a ka ke seno ka ‘nete.”
Ka nako eo, Bajodi ba ne ba phehisana khang, ba re: Eo a ka re fa nama ea hae joang, ra e ja na? Eaba Jesu o re ho bona: Kannete-nete, ke re ho lôna, ha le sa je nama ea Mor’a Motho le sa noe mali a hae, le ke ke la ba le bophelo ka ho lõna. Ea jamg nama ea ka, a e-noa mali a ka, o na le bophelo bo sa feleng, ‘me ke tla mo tsosa ka letsatsı la bofelo. Hobane Nama ea ka ke sejo ka ‘nete, ‘me mali a ka ke seno ka ‘nete.
Ea jang nama ea ka, a e-noa mali a ka, o lula ho ‘na, le ‘na ho eena. Joaloka ha Ntate ea phelang a nthomme, ‘me ‘na ke phela ka Ntate, le eena ea ntjang o tla phela ka ‘na. Bohobe bona ke bona bo theohileng leholimong. Ha bo tšoane le boo bo-ntat’a lõna ba ileng ba bo ja ‘meba e-shoa: ea jang bohobe bona o tla phela ka bosafeleng.Taba tsena o ile a li bolela, a ruta tlung ea thapelo ea Bajodi Kafarnaumna.
