Moeletsi oa Basotho Beke ea Mahlomola
Laboraro
Ho baloa Bukeng ea Moprofeta Isaia. (50,4-9)
“Ba ntlotlolotseng ha kea ka ka ba patela sefahleho sa ka.”
Morena Molimo o rutile leleme la ka; o nchorisetsa puo, hore ke tsebe ho khothatsa ea mesarelong. Hoseng ho hong le ho hong o nchorisetsa kutlo, hore ke mamele joaloka morutuoa.
Morena Molimo o nthibolotse tsebe. Ha e le ‘na, ha kea ka ka hana, leha e le ho chechela morao. Ka nehela ba nchapang mokokotlo oa ka, le ba ntlhothang litelu marama a ka. Ba ntlotlolotseng le ba ntšoetseng ka mathe, ha kea ka ka ba patela sefahleho sa ka.
Morena Molimo ke mothusi oa ka, ka baka leo ha ke na ho hlajoa ke lihlong. Ke thatafalitse sefahleho sa ka joaloka lejoe, ‘me ke tseba hore ha ke na ho soetseha.
Ea tla ntlhokisa molato o haufi; ea ka ntsekisang ke mang? A re isaneng khotla! Ea ka nqosang ke mang? Ha a ke a hlahele mona! Morena Molimo ke mothusi oa ka; ke mang ea ka ntsoang?
PESALEMA 68 (8-10.21-22.31.33-34. R. 14)
NKARABE, MOLIMO, KA HO EA KA MOHAU OA HAO O MOHOLO, KA NAKO EA KHAUHELO.
Ke ka baka la hao ke mamellang mahlapa,
ke aparetsoeng ke lihlong.
Ke se ke ka molichaba ho bana beso,
ke se ke ka ea sa tsejoeng ke bana ba ‘me.
Hobane chesehelo ea ntlo ea hao e nqetile,
le mahlapa a ba u hlapaolang a holim’a ka.
Ka lebella kutloelo-bohloko,
empa ea e-ba sieo,
ka batla ba ka ntšelisang,
empa ka se ke ka ba fumana.
Ba ntšeletse chefo lijong,
ba ba ba ‘noesa asene ha ke nyoriloe.
Ke tla tlotlisa lebitso la Molimo ka pina,
ke mo phafe ka teboho.
Ba hlophehileng ba ke ba bone, ‘me ba thabe;
betang pelo, lona ba batlang Molimo.
Ho baloa Evangeling e halalelang e ngotsoeng ke Matheus (26, 14-25)
“Mor’a motho o ikela kamoo ho ngotsoeng ka eena, empa ho malimabe eo a ekoang ke eena.”
Ka nako eo, e mong oa ba leshome le metso e ‘meli, ea neng a bitsoa Judase Iskariota, a ea ho baprista ba baholo, ‘me a re ho bona: Le rata ho mpha’ng, ke tle ke le nehele eena? Bona ba ‘malla lichelete tsa silivera tse mashome a mararo. Me ho tloha moo a batla sebaka sa ho mo nehela bona.
Ka tsatsi la pele la mokete oa Mahobe a sa lomosoang, barutuoa ba tla ho Jesu, ba re: U ka rata hore re u lokisetse ho ja Paseka kae? Jesu a re: E-eang motseng ho motho ea itseng, le re ho eena: Moruti o re: Nako ea Paseka e se e atametse; ke tla etsa Paseka, ‘moho le barutuoa ba ka, ha hao. Barutuoa ba etsa ka moo Jesu a ba laetseng kateng, ‘me ba lokisetsa Paseka.
Ha shoalane e tšoara, Jesu a qala ho ja le barutuoa ba hae ba leshome le metso e ‘meli. Ha ba ntse ba e-ja, a re: Ruri, kea le bolella, e mong oa lona o tla nkeka. ‘Me bona ba soaba haholo, ba qala ho ‘motsa ka bomong: Ebe ke ‘na, Morena? Eena a araba, a re: Ea kenyang letsoho le ‘na sejaneng, ke eena ea tla nkeka. Mor’a motho o ikela ka moo ho ngotsoeng ka eena, empa ho malimabe motho eo mor’a motho a ekoang ke eena. Ho ka be ho bile molemo ho motho eo, hoja a sa ka a tsoaloa. Judase, ea neng a mo eka, a bua a re: Ebe ke ‘na, Moruti? Jesu a re ho eena: u boletse teng.
