Nthabeleng Seitlheko Komisi e Ikemetseng ea Likhetho(IEC) e abetse Lekhotla la Bosebeletsi ba Sechaba (UAT) le African Transformation Movement (ATM), mangolo e le bopaki ba hore ba fihletse lipehelo tsohle, ‘me e se e le makhotla a ngolisitsoeng ka molao. Tsena li bile Maseru ka la 1 Tlhakubele monongoaha.
Moetapele oa UAT Dr. Mahali Phamotse, o itse ba ts’episa hore mangolo ana ha se ntho e nyane, ‘me ba tla ikobela melao eohle e tsamaisang IEC. A re UAT e tl’o fapana le ba bang ka ho isa lits’ebeletso sechabeng. A re bapolotiki ha ba ile ba fumana matla ba ipokella ka ona ba lebala sechaba se ba khethileng eba ho atileng ke bobolu, bosholu, ho hloka ‘nete ha batho ba emang mapatlelong a lipolotiki ba thetsa sechaba.
O re ho theolela matla sechabeng ha se ho qopitsa hore na naha ea Afrika Boroa e sebetsa joang. O itse litaba tseo e se be ka molomo kapa molao feela lipampiring, e tlameha ho bonahala mabatooeng le likanseleng ‘me sechaba se ts’oare ka matla ho bona hore naha e ba le chelete. O re morao tjena tokomane e tataisang bosebeletsi ba naha NSDP2 meralo ha e sa etsoa ho ipapisitsoe le eona ba nang le matla b’a e faposa.
A re ba ikemiselitse ho se sebetse ba le bang, kaha ba hlokana le Naha ea Afrika Boroa, ho qoba ho etsetsana lintho tse bohloko ka malibohong. A re likamano tsa bona le linaha tse ling li bohlokoa kaha ba batla ba bue puo e le ‘ngoe.
E le UAT ha ba re ho tlosoe maliboho empa ba rata hore ho sebelisoe likarete tsa boitsebiso ho fetisa melao.
Mongoli-Kakaretao oa African Transformation Movement (ATM) Ts’ele Lekaota , o re lekhotla lena le bile teng hobane Molimo a utloa seboko sa sechaba sa hae, ha ba tl’o loants’a mekha le makhotla a mang a lipolotiki, ha ba tl’o fetoha, ba batla manoni a naha ena a be matsohong a Basotho. A bonts’a ha sechaba sa Molimo se sotlehile se hloka khotso kahar’a sona, bona ba kahare ho kereke ba tlile kahare ho lipolotiki hobane batho bao ba ba etelletseng pele ba le seboko.
Molula-Setulo oa IEC Mphasa Mokhochane, o re ba thabile kaha mekha ena e kena kahar’a lebelo la ho bona hore na Lesotho e le naha le ea kae, ‘me seo ba se etsa hobane ba rata ho bona naha ea Lesotho e ea ho na le moo e eang.
O re ba ile likhethong ba na le makhotla a 65, ho se ho na le 50 ‘me a 15 a se a le sieo nakong ea lilemo tse peli. A re mekha e tlameha ho phela ho se ke ha phela moetapele feela. O itse ba thehile likomiti hore lintho tsohle tseo ba li etsang komising ba buisane le bona le ho soaeana mehlare, ‘me likomiti tsena li bohlokoa haholo.
IEC e se e-na le mekha e 52 ha joale.
