Bacha ba RFP b’a iketa

Bacha ba kenetseng mojao oa ho iketela likhetho tsa Komiti e Kholo ea Naha ea Bacha ba Sethala sa Kholiso ea Moruo( RFP), tse tlil’o ba ka la 23 Hlakola monongoaha, ba phatlalalitse mohoo oa bona oa likhetho, ‘mokeng oa baphatlalatsi ba litaba o bileng TRC, Maseru, ka la 15 Hlakola monongoaha moo ba bontšitseng hore mosebetsi oa ho lokisa ‘muso hore o sebetse hantle o tsebe ho isa  litšebeletso sechabeng, ha se taba ea lefapha kapa motho a le mong empa ke oa batho bohle ho kenyeletsa le bacha.

Komiti ena e tlil’o ba eona pulamaliboho  e bontšitse hore ha ba ka khethoa, liqholotso tseo ba rerileng  ho tla li sebetsa ke kanetso ea matla sechabeng, ho ba le meralo e hlakileng ea khiro ea bacha ho tsa lipolotiki, ho kenya tšebetsong leano la molao oa bacha, o kenyeletsang ho thehoa ha Lekhotla la Bacha la Naha, ho felisa tlala, bofuma, ho fana ka mesebetsi ea boleng le litsebo tsa boipheliso ho bacha.

Ba phethela ka hore ba tla boela ba susumetsa ‘muso oa habo bona ho kenyeletsa bacha ba nang le bokooa mafapheng  ohle a bophelo. “Moruo o anele ho bacha le ho pharalla le sechaba sohle sa Basotho.” Ba rialo.

Ke hona ‘mokeng ona moo ea iketelang ho ba Molula-Setulo oa Komiti ea Naha ea Bacha ba RFP, Sechaba Theko a bontšitseng hore toro ea hae e kholo ke ho holisa le ho matlafatsa Letšolo la RFP mafapheng ohle, empa haholo-holo a boetapele bo chatsi bo nang le chebelopele.