Moeletsi oa Basotho Nako ea Karisima ke matsatsi a 40 a boitokisetso ba mahloko, mahlomola, lefu le tsoho ea Jesu Kriste. E qala ka Laboraro la Molora. E be libeke tse tšeletseng re sa bale Lisontaha. Ha se nako ea lihlabelo le boitimo feela ha re ntse re itokisetsa Paseka, empa hape ke nako ea thapelo le kholo ea moea. E qetella ka Labone le Halalelang.
Ho tloloa molora ka mokhoa oa Sefapano e le letšoao la Pako, Tšokoloho, Tefelo le Thapelo. Mehleng ea khale-khale batho ba ne ba tlolla molora ho soaba, ho baka le ho ikoahlaea pontšeng. Ha ho molao o bontšang hore na motho o tlohella molora phatleng nako e kae, empa batho ba bangata ba o tlohella letsatsi lohle e le sesupo sa Tumelo le Pako ea bona. Re fumana monyetla oa ho ba haufi-ufi le Molimo. Ke nako ea ho icheba kahar’a Seipone sa Khalalelo, hore re tlameha ho lokisa kae, le ho sheba hore na metsamao ea rona e tšoana le lipuo tsa rona. “Latelang mohlala oa ka, joalokaha le ‘na ke latela Kriste” (1 Bak. 11 :1).
Matsatsi a 40 ke sesupo sa nako eo Molimo a re fang monyetla oa ho feta har’a liqholotso hore re hole moeeng. Ke nako e bohlokoahali e holisang tumelo ea rona ka ho tšepa Molimo feela maemong a hlobaetsang, joaloka bana ba Israele lehoatateng moo ba neng ba tlameha ho tšepa Molimo feela. Ke nako eo Molimo a bontšang mamello ea hae ho rona. Nako ena e bohlokoa haholo Bibeleng: Moroallo oa metsi o nkile nako e kaalo (Gen 7:12). Moshe o nkile matsatsi 40 Thabeng ea Senai a e-na le Molimo, a sa je, a sa noe (Ex. 24:18). Jesu Kriste o boetse a nka matsatsi a 40 lipakeng tsa Tsoho le Nyolohelo ea hae. Le kajeno ‘m’e o khothaletsoa ho phomola matsatsi a 40 kamor’a ho beleha ngoana. Ho nka lilemo tse 40 hore moloko o mocha o hlahe (Lip. 32:13). Mohlala: Eli (1 Sam. 4:18), Davida (2 Sam. 5:4), Solomone (1 Likh. 11:42) le Saule (Lik. 13:21). Palo ena 40 e hlaha makhetlo a ka bang 159 Bibeleng, e bontša bophelo bo bocha, kholo e ncha, phetoho ho tloha mosebetsing o moholo ho isa ho o mong o moholo. Jesu Kriste ebile o re matlafatsa ka hore re hane le ho hlola meleko ea satane (Mt 4:1-11).
Jesu o iphumanela tsela ea Molimo felleng, lehoatateng (Mareka 1:12-15). Thapelo ke nako ea lehoatata kapa ho ba lehoatateng. E ka ba kotsi haholo hobane e re kopanya le bobe le botle bo teng kahar’a rona (liphoofolo tsa naha le manyeloi). Ka ho phethahala, nako ena e re beha boemong ba ho ba le khotso ho Molimo ka ho ba le thabo ea Jesu lehoatateng.
Jesu o ile Galilea kamor’a hore Johannes a kenngoe chankaneng. Sena se bontša hore qaleho ea mosebetsi oa Jesu le rona ha se monateng empa matšoenyehong. Leha ho le joalo, ha rea lokela ho lesa ho phatlalatsa ‘Muso oa Molimo. Ke seo thuto ea pele ea Jesu e leng sona, hore ho kena ha rona Leholimong ho hloka ntho tse peli. Ea pele, re tlameha ho khoa, ho baka metsamaong e mebe le ho nena tsa ‘muso o bolileng oa lefatše lena. Ea bobeli, ke ho utloa, ho boloka le ho phatlalatsa Evangeli.
Eka hoja bohle re ka ipolela libe ho Baprista (ba emeng Lebitsong la Kriste) ka Laboraro la Molora hore re qale nako ena ka mokhoa o tšoanelang. Re lokela ho itlhahloba ka botebo hore na re ila le ho itima ling tse re arohanyang le Molimo. Ho itima kapa ho lahla ntho ho hotle, empa ho hloeka le ho etsa ketso ea mohau ho hotlehali. “Ha u khahloe ke mahlabelo; leha nka u nyehella ka secheso, u ke ke ua se amohela. Sehlabelo se ratoang ke Molimo: ke moea o soabileng; ke pelo e soabileng, e hlomohileng; oho Molimo, u ke ke oa e khesa” (Pes. 51:18-19).
Re tla elelloa hore li ngata tseo re li khomaretseng ho feta Molimo, ebile li re khannela ho mo furalla. Re na le letoto la litlhoko tsa rona, empa Molimo o kae har’a lethathamo leo? Re tl’o qeta nako ee re le joang, hokae, re khutsitse thapelong ea boinahano le Molimo ea hlokang re bake? Nako ena ke ea ho ba mong lekunutung le Morena re sa hlonama. Empa liketso tsa rona e be mehlala ea seo re se kotutseng nakong ena. “Leseli la lona le ke le khanyetse batho joalo, ba tle ba bone mesebetsi e metle ea lona, ba be ba tlotlise Ntat’a lona ea maholimong” (Mt 5:16).
Rev. Fr. Lebese Emmanuel Mokhofu OMI
