Moeletsi oa Basotho Beke ea Pele ea Karisima
Labotšelela
Ho baloa Bukeng ea Deuteronoma. (26,16-19)
“U be sechaba se khethetsoeng Morena Molimo oa hao.”
Moshe a bua le sechaba, a re: Kajeno, Morena Molimo oa hao o u laela ho phetha melao le meetlo ena. U e boloke, u b’u e phethe ka pelo eohle ea hao le ka moea oohle oa hao. Kajeno, u fumane ho Morena pallo ea hore e tla ba eena Molimo oa hao, ha feela u tsamaea litseleng tsa hae, u boloka melao, litaelo le meetlo ea hae ‘me u mamela lentsoe la hae.
Kajeno, Morena o fumane ho uena, pallo ea hore u tla ba sechaba sa hae se khethehileng, joaloka ha a u boleletse, ha feela u boloka melao eohle ea hae.
‘Me joale o tla u phahamisa ka thoriso, ka botumo le ka letlotlo, ka holim’a lichaba tsohle tseo a li entseng, u tle u be sechaba se khethetsoeng Morena Molimo oa hao, joaloka ha a boletse.
PESALEMA 118 (1-2.4-5.7-8. R. 1)
HO LEHLOHONOLO BA LATELANG MOLAO OA MORENA.
Ho lehlohonolo ba metsamao e se nang koli,
ba latelang Molao oa Morena.
Ho lehlohonolo ba utloang litemoso tsa hae,
ba ‘matlang ka pelo tsohle tsa bona.
Morena, u fane ka litaelo tsa hao,
hore li phethoe ka ho tlala.
Metsamao ea ka e ke e tšoarelle
phethisong ea thato ea hao.
Ke tla u boka ka pelo e se nang mano,
ha ke se ke ithutile likahlolo tsa toka ea hao.
Ke tla phetha thato ea hao,
u se ke ua ntahla kherehloa.
Ho baloa Evangeling e halalelang e ngotsoeng ke Matheus (5,43-48)
“Le phethehe joaloka ha le Ntat’a lona ea maholimong a phethehile.”
Ka nako eo, Jesu a re ho barutuoa ba hae: Le utloile hore ho itsoe: U tla rata oa heno ‘me u hloe sera sa hao. Empa ‘na ke re ho lona: Ratang lira tsa lona, etsetsang ba le hloileng molemo, ‘me le rapelle ba le hlorisang le ba le etselletsang, hore le tle le be bana ba Ntat’a lona ea maholimong, ea chabisetsang ba babe le ba molemo letsatsi la hae, ‘me ea nesetsang ba lokileng le ba sa lokang pula.
Haeba le rata ba le ratang, le ka lebella moputso ofe na? Hleka le bona bakhafisi ha ba etse joalo na? ‘Me ha le lumelisa bana b’abo lona feela, le feta ba bang ka’ng na? Ana le bona bahedene ha ba etse joalo na ?
Ha ho le joalo, le phethehe joaloka ha le Ntat’a lona ea maholimong a phethehile.
