Moeletsi oa Basotho Peterosi ea halalelang, Molula-Setulo oa Kriste
Labone
Ho baloa Lengolong la Pele la Moapostola Peterosi. (5,1-4)
“Alosang mohlape oa Molimo o boliseng ba lona.”
Baratuoa! Ke khothatsa baholo ba leng teng har’a lona, le ‘na ke le e mong oa bona, ke bile ke le paki ea mahlomola a Kriste le ea nang le kabelo letlotlong la hae le tlang ho senoloa.
Alosang mohlape oa Molimo o boliseng ba lona. Le o baballe ntle le ho qobelloa, e mpe e be ka boithaopo bo batloang ke Molimo; e seng ka ho tsoela moputso pelo, empa e be ka boikutloa-pelo; e seng ka ho rena holim’a ba tlas’a lona, empa e be ka ho ba lisupiso tsa ‘nete ho mohlape oa lona. ‘Me etlare mohla ho hlahang Molisa oa balisa, le tla amohela mofapahloho o sa senyeheng oa khanya.
Pesalema 22 (1-6. R. 1)
MORENA KE MOLISA OA KA, NKE KE KA HLOKA LETHO.
Morena ke molisa oa ka, nke ke ka hloka letho.
o nkatla makhulong a matalana.
O ntsamaisetsa metsing a khutsitseng,
o matlafatsa bophelo ba ka.
O ntataisa tseleng e nepahetseng
ho tlotlisa lebitso la hae.
Leha nka tsamaea khohlong e lefifi ba lefu,
ha ke tšabe bobe bofe kapa bofe.
U ntekela tafole
pontšeng ea lira tsa ka,
u ntlotsa hloho ka oli,
mohope oa ka oa khaphatseha.
Efela lehlohonolo le mohau li tla mphelehetsa
ka matsatsi ‘ohle a bophelo ba ka;
ke tla lula ka tlung ea Morena
ha feela ke ntse ke phela.
Ho baloa Evangeling e halalelang e ngotsoeng ke Matheus. (16,13-20)
“U Peterosi, ke tla be ke u nehe linotlolo tsa ‘muso oa maholimo.”
Ka nako eo, eitse ha Jesu a fihlile naheng ea Kaisaria-Filipi, a botsa barutuoa ba hae, a re: Ana batho ba re Mor’a motho ke mang? Ba mo araba, ba re: Ba bang ba re u Joannes Mohlatsoi, ba bang Elia, ba bang Jeremia kapa e mong oa baprofeta.
Jesu a re ho bona: Empa lona le re ke mang na? Simone Peterosi a araba, a re: U Kriste, Mora oa Molimo ea phelang. Jesu a fetola a re ho eena: U lehlohonolo, Simone, mor’a Jona, hobane ha se motho oa nama le mali ea u senoletseng hona, empa ke Ntate ea maholimong. ‘Me ‘na ke re ho uena: U Peterosi ‘me holim’a letlapa lena ke tla aha Kereke ea ka, ‘me likhoro tsa lihele li ke ke tsa e hlola. Ke tla be ke u nehe linotlolo tsa ‘muso oa maholimo; hohle hoo u tla ho tlama lefatšeng ho tla tlangoa le maholimong, ‘me hohle hoo u tla ho lokolla lefatšeng ho tla lokolloa le maholimong.
Joale a laela barutuoa ba hae hore ba se bolelle motho ho ba ke eena Kriste.
