La 21 Hlakola 2024

Beke ea pele ea Karisima

Laboraro

Ho baloa Bukeng ea Moprofeta Jonas. (3,1-10)

“Batho ba Ninive ba tlohela metsamao ea bona e mebe.”

Matsatsing ao, lentsoe la Morena la fihlela Moprofeta Jonas la bobeli, la re: Tsamaea, u ee Ninive, motseng oo o moholo, ‘me u rute ho oona thuto eo ke u bolellang eona. Eaba Jonas o tloha ho ea Ninive ka taelo ea Morena. Ninive e ne e le motse o moholohali, o nkang motho matsatsi a mararo ho o phunyeletsa.

Jonas a qala ho kena motseng, a tsamaea leeto la letsatsi le le leng, a ntse a hooa, a re: Ka mora’ matsatsi a mashome a mane, Ninive e tla timetsoa. Eaba batho ba Ninive ba lumela ho Molimo; ba beha letsatsi la ho itima lijo, ‘me ba apara liaparo tse mahoashe, ho tloha ka e moholo ho isa ho e monyenyane.

Ha taba tseo li fihla ho Morena oa Ninive, le eena a phahama teroneng ea hae, a hlobola kobo ea hae, a apara seaparo se mahoashe, a lula moloreng.

Eaba hoa hoeletsoa ‘me ho phatlalatsoa Ninive taelo e tsoang ho morena le ho matona a hae, e reng: Ho se ke ha e-ba motho kapa phoofolo, khomo kapa nku, tse ka latsoang letho. Li se fule, leha e le ho noa metsi. Ho aparoe liaparo tse mahoashe ke batho, le ke tsona liphoofolo, ‘me ho hoeletsoe ho Morena ka matla; e mong le e mong a tlohele metsamao ea hae e mebe le bokhopo boo a bo entseng. Ho tseba mang ha eba Molimo a ka hauha ‘me a re tšoarela, a kokobetsa khalefo e tukang ea hae, re tle re se ke ra timela na?

Molimo a bona ka liketso tsa bona kamoo ba furallang metsamao ea bona e mebe kateng; eaba Molimo o fetola morero oa hae oa ho ba otla; a fela a se ke a ba otla.

PESALEMA 50   (3-4.12-13.18-19. R. 19)

PELO E ROBEHILENG, E MATETETSO, UENA MOLIMO, HA U E KHESE.

Nkhauhele, oho Molimo, ka lerato la hao;

ka baka la boholo ba mehauhelo ea hao

u hlakole melato ea ka.

Ntlhatsoe, u ntlhatsoisise phoso ea ka,

u ntlhoekise sebe sa ka.      

Mpopele pelo e hloekileng, oho Molimo,

nchafatsa ka ho ‘na moea o tiileng

U se ntahlele hole le sefahleho sa hao,

u se nkamohe moea o halalelang oa hao.

Hobane ha u khahloe ke sehlabelo,

leha nka u nyehela secheso,

u ke ke ua se amohela.

Sehlabelo ho Molimo ke moea o robehileng;

pelo e robehileng, e matetetso, uena Molimo ha u e khese.

Ho baloa Evangeling e halalelang e ngotsoeng ke Luka    (11,29-32)

“Moloko ona o ke ke oa nehoa pontšo, ha e se pontšo ea moprofeta Jonase.”

Ka nako eo, ha matšoele a mathela ho Jesu, a qala ho bua, a re: Moloko ona ke moloko o mobe; o batla pontšo, empa o ke ke oa e nehoa, ha e se pontšo ea Jonase. Hobane joaloka ha Jonase e bile pontšo ho BaNinive, le eena Mor’a Motho e tla ba eona ho moloko ona.

Mohla kahlolo Mofumahali oa Boroa o tla qosana le batho ba moloko ona, ‘me o tla ba tsoa; ka hobane o ne a tlohe pheletsong ea lefatše ho tla mamela bohlale ba Salomone, empa ho teng mona ea fetang Salomone.

Mohla kahlolo batho ba Ninive ba tla qosana le moloko ona, ‘me ba tla o tsoa; ka hobane ba ile ba baka ka baka la thuto ea Jonase, empa ho teng mona ea fetang Jonase.