Tšeliso Thakholi Setlamo sa Mekhatlo ea Bahlanka ba Lesotho (COLEPE), se re ‘Muso oa Lesotho o fetohetse qeto ea ho kena lipuisanong tsa khotso le ‘nete, moo mokhatlo o kopileng keketso ea nyollo ea meputso ea bahlanka ka 25%. Tsena li hlaheletse ‘mokeng oa baphatlalatsi ba litaba o bileng mabaleng a Liofisi tsa LAT, Maseru, ka la 15 Pherekhong monongoaha.
Mongoli-Kakaretso oa LAT Monghali Letsatsi Ntsibolane o boletse hore kamor’a ho etsa kopo ea nyollo ea meputso ea bahlanka ka 25%, Tona-Kholo ka seqo, o ile a tla ho COLEPE a kopa hore kaha o kena tšebetsong ho se na letho, ba mpe ba mo fe nako ea selemo e leng se fetileng sa lichelete hore ba itlhophe. “Empa ha re se re lokela ho kena lipuisanong ‘muso o se o sa fumanehe, o se o phathahane, ke hore re tsoeng ka lekhalo le leng, leo re tla phatlalatsa ha basebetsi ba se ba supile hore na ke lefe.” A rialo. 
Ntsibolane o re boitlamo ba ‘muso bo ne bo re o ntse o itlhophela litaba tsa selemo se tlang sa lichelete se lokelang ho qala ka Pulungoana, ‘me e ile ea feta. “Re ile ra etsa sohle seo basebetsi ba ka se etsang ho lokisetsa lipuisano.” A re bohareng ba Tšitoe ba ile ba boela ba qala ho ntšetsapele taba ea lipuisano, ‘me ba itlama hore litaba tsena ba tla li tlahela qetellong ha ba se ba lumellane kapa ba hanane le ‘muso.
A re ke hona moo ‘muso o bileng oa imatlafatsa ka ho theha letsoho la ona, e leng komiti e neng e bopiloe ka a mang a mafapha a ‘muso. A re ba bile le liphutheho tse peli tse ileng tsa atleha haholo, moo ba bileng ba kholisa ‘muso mabaka ao ka ona ba kopang keketso ea nyollo ea meputso ka 25%. “Ho neng ho setse ke hore joale bohlanka bo nke litaba tseo bo li behe ho ‘muso ka matona, e be rea lumellana hore na re sebetsa joang.” O boletse joalo a bile a eketsa ka hore tumellano e ne e le hore mosebetsi ona o be o felile ka la 12 Pherekhong 2024, empa joale ha ba se ba batla ho utloa hore na ‘muso o se o le hakae, karabo eo ba ileng ba e fumana ke ea hore matona a phathane ke liphutheho.
O re ke mona moo ba ileng ba lemoha hore litaba tsa bona tse kholo tsa nyollo ea meputso ka 25% le hore bahlanka ba Grade A le B ba nyolloe moo ba le teng, e leng litaba tseo ho lumellanoeng ka tsona, “Ra bona hore ‘muso o se o phathahane ‘me lipuisano li ba kotsing.” A qetella ka hore ba ipotsa le hore na ka la 19 Pherekhong ho latela kopo ea ‘muso ea hore ba boele ba kopane ba tla ba teng na, haele mona ‘muso o se o se na nako ea bona.
Mongoli-Kakaretso oa LEPSA, Mofumahali Motebang Leboela eena o ipilelitse ho ‘muso ho akofisa litaba tsena ka khotso, molemong oa bohle kaha ho sa tl’o ba thusa ka letho ho loantšana. A tiisa hore bona e le mekhatlo ha se thahasello ea bona ho utloisa sechaba bohloko ka ho se fane ka litšebeletso tse lebeletsoeng, empa ba lakatsa hore ‘muso o sekehele sello sa bona tsebe.
