La 22 Tšitoe 2023

Labohlano

 Ho baloa Bukeng ea Pele ea Samuele. (1,24-28)

 Anna o lebohela tsoalo ea Samuele.

Matsatsing ao, hoba Anna a khoise Samuele, a tsamaea le eena a qhoba pohoana ea mohatelo, a nkile seshobana sa phofo le lekuka la veine, a mo isa Shilo tlung ea Morena. Moshanyana o n’a sa fokola.

Ha hlajoa khomo, ‘me ngoana a tlisoa ho Elia. Anna a re: Ak’u ‘mamele, moren’a ka! Ke u hlapanyetsa ho phela, moren’a ka: ke ‘na mosali eane, ea na beng a eme hona mona pel’a hao, a rapela Morena. Ke eena moshanyana eo ke neng ke ikopela eena. Morena o ananetse köpo ea ka. Joale le ‘na ke mo abela Morena, ‘me efela e tla ba ea abetsoeng Morena matsatsi ‘ohle a bophelo ba hae. Eaba ba khumamela Morena hona moo.

Pesalema  (1. 2,1.4-8. 1)         

Pelo ea ka e thabetse Morena, mopholosi oa ka.

Pelo ea ka e thabetse Morena,

ke tsoha molota ka baka la Molimo oa ka.

Ke tlepa lira tsa ka litšeho,

hobane ke thabetse pholoho ea hao.

Liqha tsa bahale li robehile,

athe ba fokolang ba itlamme thekeng ka matla.

Ba neng ba khora ba ikhirisetsa lijo;

athe ba neng ba lapa ha ba sa hloka ho sebetsa.

Nyopa e beleha ha supa,

athe ea bana ba bangata o saretsoe.

Morena o Iaola lefu le bophelo,

o theolela Qalong-ea-bafu, a be a inole.

Morena oa futsanehisa ‘me oa ruisa;

oa kokobetsa, a be a phahamise.

O nts’a mofutsana litholeng,

o nyolla mohloki thotobolong,

ho mo beha har’a mahosana

le ho mo fa setulo sa tlhompho.

Ho baloa Evangeling e halalelang e ngotsoeng ke Luka.      (1.46-56)

“Ea matla-‘ohle o nketselitse tse kholo.”

Ka nako eo, Maria a re: Pelo ea ka e tlotlisa Morena, moea oa ka o thabetse Molimo Mopholosi oa ka. O bone ho eiseha ha lekhabunyane la hae; ho tloha joale meloko eohle e tla mpitsa ea lehlohonolo, hobane Ea matla-‘ohle o nketselitse tse kholo.

Lebitso la hae lea halalela. Mohau oa hae o aparela ba mo tšabang, ka meloko le meloko. O sebelitse tse matla ka letsoho la hae, o qhalantse ba pelo li ikhohomosang.

O theotse ba matla literoneng, o phahamisitse ba eisehang. Ba lapileng o ba khorisitse tse molemo, ba ruileng o ba tebetse ba se na letho. O thusitse Israele mohlanka oa hae, a sa lebale ho paka mohau oa hae, joaloka ha a n’a baletse bo-ntat’a röna, Abrahama le litloholo tsa hae ka mehla eohle.

Maria a lula le Elizabetha likhoeli tse batlileng ho ba tharo, a nt’o boela tlung ea hae.